Bhadrachalam Area Hospital: పోలవరం జిల్లా ఎటపాక మండలం గొల్లగుప్పలో క్లోరోక్విన్ మాత్రల పంపిణీ ఘటన తీవ్ర విషాదాన్ని మిగిల్చింది. క్లోరోక్విన్ మాత్రలు వికటించడంతో మొత్తం 71 మంది అస్వస్థతకు గురైనట్లు అధికారులు తెలిపారు. మాత్రల డోస్ ఎక్కువ కావడం వల్లే ఈ పరిస్థితి తలెత్తినట్లు ప్రాథమికంగా వెల్లడైంది. ఈ ఘటనలో ఇప్పటికే ఇద్దరు విద్యార్థులు మృతి చెందడంతో బాధిత కుటుంబాల్లో తీవ్ర విషాదం నెలకొంది.

అస్వస్థతకు గురైన బాధితులను వెంటనే భద్రాచలం ఏరియా ఆసుపత్రికి తరలించి చికిత్స అందిస్తున్నారు. ప్రస్తుతం ఆసుపత్రిలో చికిత్స పొందుతున్న బాధితుల ఆరోగ్య పరిస్థితి నిలకడగా ఉందని అధికారులు వెల్లడించారు. మరోవైపు ఘటనపై ప్రభుత్వం అప్రమత్తమైంది. బాధితులకు అందుతున్న వైద్య సేవలు, తాజా పరిస్థితిపై కలెక్టర్ దినేష్‌కుమార్ మంత్రి సత్యకుమార్‌కు వివరించారు.

బాధితుల ఆరోగ్య పరిస్థితిపై మంత్రి సత్యకుమార్ అధికారులతో సమీక్షించారు. చికిత్సలో ఎలాంటి లోపం లేకుండా బాధితులకు మెరుగైన వైద్య సేవలు అందించాలని ఆదేశించారు. అవసరమైన అన్ని రకాల మందులు, వైద్య సదుపాయాలు ఆసుపత్రిలో అందుబాటులో ఉంచాలని స్పష్టం చేశారు. బాధితుల ఆరోగ్య పరిస్థితిని ఎప్పటికప్పుడు పర్యవేక్షిస్తూ, అవసరమైన అత్యవసర వైద్య సహాయం అందేలా చర్యలు తీసుకోవాలని అధికారులను ఆదేశించారు. క్లోరోక్విన్ ఘటన నేపథ్యంలో గొల్లగుప్పతో పాటు పరిసర ప్రాంతాల్లోనూ ఆందోళన నెలకొంది.

Chloroquine Tablets: ఆంధ్రప్రదేశ్‌లోని ఎటపాక మండలం గొల్లగుప్పలో విషాద ఘటన చోటుచేసుకుంది. స్థానిక పాఠశాలలో విద్యార్థులకు క్లోరోక్విన్ మాత్రలు పంపిణీ చేసిన అనంతరం పలువురు అస్వస్థతకు గురైనట్లు సమాచారం. మొత్తం 73 మంది విద్యార్థులకు మాత్రలు పంపిణీ చేయగా, వారిలో సుమారు 20 మంది విద్యార్థులకు వాంతులు, అస్వస్థత వంటి సమస్యలు తలెత్తినట్లు తెలుస్తోంది. దీంతో పాఠశాల సిబ్బంది, తల్లిదండ్రులు ఆందోళనకు గురయ్యారు.

అస్వస్థతకు గురైన విద్యార్థులను వెంటనే చికిత్స నిమిత్తం భద్రాచలం ఏరియా ఆసుపత్రికి తరలించారు. చికిత్స పొందుతూ ఇద్దరు విద్యార్థులు మృతి చెందినట్లు సమాచారం. మరో ఐదుగురు విద్యార్థుల పరిస్థితి విషమంగా ఉన్నట్లు తెలుస్తోంది. ఒకేసారి పెద్ద సంఖ్యలో విద్యార్థులు అస్వస్థతకు గురికావడం, ఇద్దరు ప్రాణాలు కోల్పోయారన్న సమాచారంతో గొల్లగుప్పలో తీవ్ర విషాదం నెలకొంది. విద్యార్థుల కుటుంబ సభ్యులు ఆసుపత్రికి చేరుకోవడంతో అక్కడ ఆందోళనకర పరిస్థితి ఏర్పడింది.

అయితే విద్యార్థుల అస్వస్థతకు క్లోరోక్విన్ మాత్రలే కారణమా, మాత్రల మోతాదు లేదా ఇతర కారణాలేమైనా ఉన్నాయా అనే విషయాలపై అధికారికంగా పూర్తి వివరాలు వెల్లడికావాల్సి ఉంది. ఘటనకు సంబంధించి వైద్యాధికారుల పరిశీలన అనంతరమే విద్యార్థుల అస్వస్థత, మరణాలకు ఖచ్చితమైన కారణం స్పష్టమయ్యే అవకాశం ఉంది. పాఠశాలలో విద్యార్థులకు మాత్రలు ఎవరి సూచనల మేరకు పంపిణీ చేశారు, పంపిణీ సమయంలో ఎలాంటి జాగ్రత్తలు తీసుకున్నారనే అంశాలపైనా స్పష్టత రావాల్సి ఉంది.