K Narayana: తెలంగాణ కాంగ్రెస్‌ పార్టీలో అంతర్గత విభేదాలు కొనసాగుతున్నాయని సీపీఐ జాతీయ కార్యదర్శి కె. నారాయణ అన్నారు. కాంగ్రెస్‌ నేతల మధ్య జరుగుతున్న అంతర్గత కలహాల ప్రభావం రాష్ట్ర రాజకీయాలపై పడుతోందని, ఈ పరిస్థితులతో బీఆర్ఎస్‌ మళ్లీ పుంజుకునే అవకాశం ఉందని వ్యాఖ్యానించారు. ముఖ్యమంత్రి రేవంత్‌రెడ్డి నిక్కచ్చిగా వ్యవహరిస్తూ ఎలాంటి తప్పులకు తావులేకుండా పాలన సాగిస్తేనే మంత్రులు, కిందిస్థాయి అధికారులు భయంతో బాధ్యతగా పనిచేస్తారని అన్నారు.

22ఏ భూములకు సంబంధించిన నిబంధనలను కొందరు దారుణంగా దుర్వినియోగం చేస్తున్నారని కె. నారాయణ ఆరోపించారు. ఈ విషయంలో ప్రభుత్వం స్పష్టమైన చర్యలు తీసుకోవాల్సిన అవసరం ఉందన్నారు. మరోవైపు తెలంగాణ ప్రభుత్వంలో సీపీఐ భాగస్వామి కాదని ఆయన స్పష్టం చేశారు. ఎన్నికల సమయంలో కాంగ్రెస్‌తో కేవలం సీట్ల సర్దుబాటు మాత్రమే చేసుకున్నామని తెలిపారు.

కాంగ్రెస్‌ ప్రభుత్వం తమ సూచనలను పట్టించుకోవడం లేదని కె. నారాయణ అసంతృప్తి వ్యక్తం చేశారు. ప్రజా సమస్యలు, పాలనకు సంబంధించిన అంశాలపై తాము చేస్తున్న సూచనలను ప్రభుత్వం పరిగణనలోకి తీసుకోవాలని కోరారు. కాంగ్రెస్‌ పార్టీలో అంతర్గత విభేదాలను పరిష్కరించుకోకపోతే రాజకీయంగా ఆ పార్టీకి ఇబ్బందులు ఎదురయ్యే అవకాశం ఉందని ఆయన వ్యాఖ్యల ద్వారా స్పష్టం చేశారు.