Narayanpet Government Hospital Power Cut: నారాయణపేట జిల్లా ప్రభుత్వ ఆసుపత్రిలో విద్యుత్ సరఫరా నిలిచిపోవడంతో రోగులు, వారి సహాయకులు తీవ్ర ఇబ్బందులు ఎదుర్కొన్నారు. రాత్రి 10 గంటల నుంచి తెల్లవారుజాము వరకు ఆసుపత్రిలో విద్యుత్ లేకపోవడంతో వార్డులన్నీ అంధకారంలో మునిగిపోయాయి. చికిత్స కోసం చేరిన రోగులు, వారిని చూసుకునేందుకు వచ్చిన అటెండర్లు తీవ్ర ఉక్కపోత, దోమల బెడదతో రాత్రంతా నిద్రలేక అవస్థలు పడ్డారు. విద్యుత్ సరఫరా నిలిచిపోవడంతో ఫ్యాన్లు, ఇతర విద్యుత్ పరికరాలు పనిచేయకపోవడం వల్ల రోగుల పరిస్థితి మరింత దయనీయంగా మారింది.

ముఖ్యంగా చిన్నారులు, వృద్ధులు, అత్యవసర చికిత్స పొందుతున్న రోగులు తీవ్ర అసౌకర్యానికి గురైనట్లు సమాచారం. ఆసుపత్రిలో అత్యవసర పరిస్థితుల్లో ప్రత్యామ్నాయ విద్యుత్ వ్యవస్థ సక్రమంగా పనిచేయలేదనే ఆరోపణలు కూడా వినిపిస్తున్నాయి. ప్రభుత్వ ఆసుపత్రిలో గంటల తరబడి విద్యుత్ లేకపోవడంపై రోగుల బంధువులు తీవ్ర ఆగ్రహం వ్యక్తం చేశారు. ఆసుపత్రిలో కనీస సౌకర్యాలు కూడా లేకపోతే ప్రజలు ఎలా వైద్యం పొందాలని ప్రశ్నించారు. ఇలాంటి ఘటనలు పునరావృతం కాకుండా ఆసుపత్రిలో విద్యుత్ బ్యాకప్ వ్యవస్థను బలోపేతం చేయాలని, బాధ్యులపై చర్యలు తీసుకోవాలని వారు డిమాండ్ చేస్తున్నారు.

Mahabubabad News: మహబూబాబాద్ ప్రభుత్వ ఆసుపత్రిలో తీవ్ర నిర్లక్ష్యం వెలుగుచూసిందంటూ ఓ కుటుంబం ఆరోపిస్తోంది. అనారోగ్యంతో ఆసుపత్రికి వచ్చిన నాలుగేళ్ల చిన్నారికి గడువు ముగిసిన సిరప్‌ను ఆసుపత్రి సిబ్బంది ఇచ్చారంటూ బాలుడి తండ్రి తీవ్ర ఆగ్రహం వ్యక్తం చేశారు. ఈ ఘటన స్థానికంగా కలకలం రేపగా, ప్రభుత్వ ఆసుపత్రుల్లో మందుల నాణ్యత, పర్యవేక్షణపై ప్రశ్నలు తలెత్తుతున్నాయి.

మహబూబాబాద్ పట్టణంలోని ఇందిరానగర్ కాలనీకి చెందిన మురళి తన నాలుగేళ్ల కుమారుడు ఎనోస్ రాజ్‌ను వాంతులు, విరేచనాలతో బాధపడుతుండటంతో ప్రభుత్వ ఆసుపత్రికి తీసుకెళ్లారు. అక్కడ ఓపీలో వైద్యులు చిన్నారిని పరీక్షించి రెండు రకాల సిరప్‌లు రాశారు. అందులో ఒక సిరప్‌ను ఆసుపత్రి ఫార్మసీ నుంచి ఇవ్వగా, మరో మందును బయట నుంచి కొనుగోలు చేయాలని సిబ్బంది సూచించారు.

ఇంటికి వెళ్లిన తర్వాత చిన్నారికి మందు వేసే ముందు సిరప్ సీసాపై ఉన్న గడువు తేదీని పరిశీలించిన తండ్రి మురళి ఒక్కసారిగా షాక్‌కు గురయ్యారు. సిరప్‌కు జూన్-2026లోనే గడువు ముగిసినట్లు గుర్తించారు. వెంటనే మందుతో కలిసి ఆసుపత్రికి చేరుకుని సిబ్బందిని నిలదీశారు. ఈ క్రమంలో తండ్రికి, ఆసుపత్రి సిబ్బందికి మధ్య తీవ్ర వాగ్వాదం చోటుచేసుకుంది.

"గడువు ముగిసిన మందు ఇస్తే పిల్లాడు చావాలా?.. ప్రభుత్వ ఆసుపత్రిలో ఇంత నిర్లక్ష్యమా?" అంటూ బాలుడి తండ్రి ఆగ్రహం వ్యక్తం చేశారు. ఆసుపత్రిలో రోగులకు అందించే మందుల గడువు తేదీలను ఎవరూ పరిశీలించడం లేదా అని ప్రశ్నించారు. ఇలాంటి నిర్లక్ష్యంతో అమాయకుల ప్రాణాలు ప్రమాదంలో పడే అవకాశం ఉందని ఆవేదన వ్యక్తం చేశారు.

ఈ ఘటనపై సంబంధిత అధికారులు విచారణ జరిపి బాధ్యులపై చర్యలు తీసుకోవాలని స్థానికులు డిమాండ్ చేస్తున్నారు. అలాగే ప్రభుత్వ ఆసుపత్రుల్లో నిల్వ ఉంచిన మందుల గడువు తేదీలను వెంటనే తనిఖీ చేసి, రోగులకు నాణ్యమైన మందులే అందేలా చర్యలు చేపట్టాలని కోరుతున్నారు.