Teacher Sleeping Viral Video: ఒకప్పుడు పాఠశాల అంటే ఒక పవిత్రమైన గుడి.. గురువు అంటే ప్రత్యక్ష దైవం! ఉపాధ్యాయుడు తరగతి గదిలోకి అడుగుపెడితే క్రమశిక్షణ, శ్రద్ధ, నేర్చుకోవాలనే తపన కనిపించేవి. ఏ విద్యార్థి అయినా పాఠం వినకుండా నిద్రపోతే గురువు మందలించి, వారి భవిష్యత్తును తీర్చిదిద్దేవారు. కానీ కాలం మారింది.. విలువలు తలకిందులయ్యాయి! నేడు కొందరు ఉపాధ్యాయుల నిర్లక్ష్యం, విద్యార్థుల్లో క్రమశిక్షణ లోపం విద్యా వ్యవస్థపై ప్రశ్నలు లేవనెత్తుతోంది. ఇందుకు ఉత్తరప్రదేశ్‌లోని కన్నౌజ్ జిల్లా ఉమర్దా బ్లాక్ పరిధిలోని సిక్రోరీ కాంపోజిట్ ప్రభుత్వ పాఠశాలలో జరిగిన ఘటన ఉదాహరణగా నిలిచింది.

వైరల్ అవుతున్న వీడియో..

ఓ ఉపాధ్యాయుడు తరగతి గదిలో బల్లపై తలవాల్చి నిద్రపోతుండగా, ఎదురుగా కూర్చున్న విద్యార్థులు ఎలాంటి పాఠాలు లేకుండా మొబైల్ ఫోన్లు ఉపయోగిస్తూ కనిపించారు. ఈ దృశ్యాలు సోషల్ మీడియాలో వైరల్ కావడంతో ప్రభుత్వ పాఠశాలల్లో విద్యా ప్రమాణాలు, పర్యవేక్షణ, ఉపాధ్యాయుల బాధ్యతలపై నెటిజన్లు తీవ్ర విమర్శలు వ్యక్తం చేస్తున్నారు. వీడియో వెలుగులోకి రావడంతో స్థానిక విద్యాశాఖ అధికారులు ఘటనపై దృష్టి సారించారు. వైరల్ వీడియోలోని అంశాలపై విచారణ చేపట్టి, వాస్తవాలు నిర్ధారించిన తర్వాత బాధ్యులపై తగిన చర్యలు తీసుకుంటామని అధికారులు తెలిపారు. ప్రస్తుతం ఈ ఘటన ఉత్తరప్రదేశ్‌లో చర్చనీయాంశంగా మారింది.

Uttar Pradesh: ఉత్తరప్రదేశ్‌లోని మీరట్ జిల్లాలో షాకింగ్ ఘటన చోటుచేసుకుంది. గంగాజలాన్ని తీసుకుని యాత్ర చేస్తున్న కన్వరియాలపై ఓ బైకర్ ప్రమాదవశాత్తు ఢీకొట్టడంతో ఉద్రిక్త పరిస్థితులు నెలకొన్నాయి. ప్రమాదం జరిగిన వెంటనే బైకర్ అక్కడి నుంచి తప్పించుకునేందుకు ప్రయత్నించగా, స్థానికులు పోలీసులకు సమాచారం అందించారు. దీంతో ఇద్దరు పోలీసులు వెంటనే ఘటనాస్థలికి చేరుకుని పరిస్థితిని అదుపులోకి తీసుకురావడానికి ప్రయత్నించారు.

అయితే పోలీసులు అక్కడికి చేరుకునేలోపే బైకర్ పరారయ్యాడు. దీంతో ఆగ్రహానికి గురైన కన్వరియాలు "మీ వల్లే అతడు తప్పించుకున్నాడు" అంటూ పోలీసులపై ఆగ్రహం వ్యక్తం చేశారు. పరిస్థితిని శాంతింపజేయడానికి ప్రయత్నించిన పోలీసులపైనే ఒక్కసారిగా దాడికి దిగారు. పోలీసుల యూనిఫాం బట్టలు చించి, కర్రలతో వెంటాడుతూ దాడి చేసినట్లు సమాచారం. ఈ ఘటనతో అక్కడ కొంతసేపు తీవ్ర ఉద్రిక్త పరిస్థితులు నెలకొన్నాయి.

దాడి సమాచారం అందుకున్న ఉన్నతాధికారులు అదనపు పోలీసు బలగాలను అక్కడికి పంపించి పరిస్థితిని అదుపులోకి తీసుకొచ్చారు. గాయపడిన పోలీసులకు వైద్య చికిత్స అందించారు. ఘటనకు సంబంధించిన వీడియోలు సోషల్ మీడియాలో వైరల్ కావడంతో ఈ సంఘటన దేశవ్యాప్తంగా చర్చనీయాంశంగా మారింది. ఈ ఘటనపై కేసు నమోదు చేసిన పోలీసులు, దాడిలో పాల్గొన్న కన్వరియాలను గుర్తించే పనిలో నిమగ్నమయ్యారు. వీడియో ఆధారాలు, సీసీటీవీ ఫుటేజీలను పరిశీలిస్తూ నిందితులపై చట్టపరమైన చర్యలు తీసుకుంటామని అధికారులు తెలిపారు.

హర్యానాలో ఘోర రోడ్డు ప్రమాదం జరిగింది. అతివేగంగా వెళ్తున్న ట్రక్కు మినీ బస్సును ఢీకొట్టడంతో ఏడుగురు అక్కడికక్కడే మృతిచెందారు. 20మందికి గాయాలయ్యాయి. ఈ ఘటనకు సంబంధించి వివరాలు ఇలా ఉన్నాయి. ఉత్తర్‌ప్రదేశ్‌లోని బులంద్ షహర్ నుంచి భక్తులు వైష్ణో దేవిని దర్శించుకోవడానికి మినీ బస్సులో బయల్దేరారు. 

ఈ క్రమంలో ఢిల్లీ-జమ్మూ జాతీయ రహదారిపై అతివేగంతో వెళ్తున్న ట్రక్కు వీరు ప్రయాణిస్తున్న మినీ బస్సును ఢీకొట్టింది. దీంతో తీవ్రగాయాలపాలై ఏడుగు మృతిచెందగా మరో 20 మందికి పైగా గాయాలపాలయ్యారు. బస్సులోని ప్రయాణికులు ఒకే కుటుంబానికి చెందిన వారీగా గుర్తించారు. 

అతివేగమే ప్రమాదానికి కారణమని పోలీసులు వెల్లడించారు. మృతదేహాలను పోస్టుమార్టం నిమిత్తం తరలించారు. క్షతగాత్రులను చికిత్స నిమిత్తం అంబాలా ఆసుపత్రికి తరలించి చికిత్స అందిస్తున్నట్లు తెలిపారు. ఈ ఘటనపై కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.