KTR vs Revanth Reddy: పేపర్ లీక్ వ్యవహారంలో బీఆర్ఎస్ అధినేత కేసీఆర్, పార్టీ వర్కింగ్ ప్రెసిడెంట్ కేటీఆర్ పాత్ర ఉందన్న ముఖ్యమంత్రి రేవంత్‌రెడ్డి ఆరోపణలపై కేటీఆర్ తీవ్రంగా స్పందించారు. కనీసం ఒక్కసారైనా ముఖ్యమంత్రిలా బాధ్యతాయుతంగా ప్రవర్తించాలని రేవంత్‌రెడ్డికి సూచించారు. పేపర్ లీక్ వంటి దురదృష్టకర ఘటనపై ఫేక్ న్యూస్ ప్రచారం చేయడం సీఎం పదవికే అవమానకరమని విమర్శించారు. గ్లోబరీనాతో బీఆర్ఎస్‌కు, తన కుటుంబానికి, తనకు ఎలాంటి సంబంధం లేదని స్పష్టం చేశారు. ఈ ఆరోపణలపై త్వరలో లీగల్ నోటీసులు పంపిస్తానని, క్షమాపణ చెప్పకపోతే చట్టపరమైన చర్యలు ఎదుర్కోవాల్సి వస్తుందని హెచ్చరించారు. తనపై వచ్చే ప్రతి ఆరోపణకు తాను స్పందించకపోవడం వాటిని అంగీకరించినట్లు కాదని, బురదలో కుస్తీ పట్టడం ఇష్టం లేకనే మౌనంగా ఉంటానని కేటీఆర్ పేర్కొన్నారు.