Vietnam Indian Tourist: మనోళ్లు మారరు.. ప్రపంచంలో ఏ మూలకు వెళ్లినా తమ బుద్ధులను వదులుకోరని నెటిజన్లు తీవ్ర ఆగ్రహం వ్యక్తం చేస్తున్నారు. విదేశాలకు వెళ్లి అక్కడ మన దేశ పరువును బజారున పడేస్తున్న ఘటనలు రోజురోజుకూ పెరిగిపోతున్నాయి. తాజాగా వియత్నాంలో ఓ భారతీయ పర్యాటకుడు చేసిన పనికి భారతీయుల పట్ల ఉన్న గౌరవం కాస్తా గంగలో కలిసిపోయిందనే విమర్శలు వెల్లువెత్తుతున్నాయి!

ఉచిత ప్రయాణం.. భారతీయుడి చేతివాటం

సంఘటన వివరాల్లోకి వెళ్తే.. గౌరవ్ అగర్వాల్ అనే పర్యాటకుడు వియత్నాంలో ఒక క్యాబ్‌ను బుక్ చేసుకున్నాడు. గమ్యస్థానానికి చేరుకున్న తర్వాత మీటర్ ఛార్జీ చెల్లించాల్సి రాగా.. నా దగ్గర రూపాయి లేదంటూ ఏమీ తెలియనట్లు జారుకున్నాడు. సదరు డ్రైవర్ "డబ్బులు ఇవ్వండి సార్" అని ఎంత వేడుకున్నా.. గౌరవ్ కనీసం కరుణించకుండా, సమాధానం కూడా చెప్పకుండా అక్కడి నుంచి ఉడాయించాడు. దీంతో నిరాశకు గురైన డ్రైవర్, ఆ భారతీయుడి ఘనకార్యాన్ని సోషల్ మీడియాలో పెట్టడంతో ఆ వీడియో కాస్తా రచ్చగా మారింది.

ఒక విదేశీయుడి ఉపాధిని దెబ్బతీయడమే కాకుండా.. భారతీయులందరి ఇమేజ్‌ను చెడగొట్టాడని డ్రైవర్ ఆవేదన వ్యక్తం చేశాడు. ఈ ఘటన వెలుగులోకి రావడంతో నెటిజన్లలో భిన్నమైన అభిప్రాయాలు, తీవ్ర వివాదం రేగుతోంది. మన దేశంలో అలవాటైన ఉచితాల అలవాట్లను, తెలివితేటలను విదేశాల్లో కూడా ఉపయోగిస్తున్నారా? ఒకరిద్దరు చేసే ఇలాంటి దిగజారుడు పనుల వల్ల రేపు విదేశాల్లో భారతీయులకు రుణాలు, క్యాబ్‌లు, రూమ్‌లు ఇవ్వడానికి కూడా భయపడే పరిస్థితి వస్తుందని కొందరు ఘాటుగా విమర్శిస్తున్నారు.

మరికొందరు మాత్రం "ఎక్కడైనా మంచి, చెడు మనుషులు ఉంటారు. ఒక్క గౌరవ్ అగర్వాల్ చేసిన చిల్లర పనికి మొత్తం 140 కోట్ల మంది భారతీయులను నిందించడం సరికాదని వాదిస్తున్నారు. విదేశాలకు వెళ్లి ఉచితాలు అనుభవించడం, రూల్స్ అతిక్రమించడం, ఛార్జీలు ఎగ్గొట్టడం లాంటి పనులు మన దేశ సంస్కృతిని కాదని, దిగజారుడుతనానికి నిదర్శనమని పర్యాటక నిపుణులు హెచ్చరిస్తున్నారు. ఇప్పటికైనా విదేశాలకు వెళ్లే భారతీయులు బాధ్యతగా ప్రవర్తించకపోతే.. ప్రపంచ పటంలో భారత పర్యాటకుల ఇమేజ్ తీవ్రంగా దెబ్బతినడం ఖాయం!

Shamshabad Indigo employee: హైదరాబాద్‌లో మహిళల భద్రతపై మరోసారి ఆందోళన కలిగించే ఘటన వెలుగులోకి వచ్చింది. విధులకు హాజరయ్యేందుకు శంషాబాద్ రాజీవ్ గాంధీ అంతర్జాతీయ విమానాశ్రయానికి బయలుదేరిన ఓ ఇండిగో ఎయిర్‌లైన్స్ ఉద్యోగినిపై క్యాబ్ డ్రైవర్ అత్యాచారానికి పాల్పడిన ఘటన తీవ్ర కలకలం రేపింది. ఈ ఘటనపై పోలీసులు వెంటనే స్పందించి నిందితుడిని అదుపులోకి తీసుకున్నారు.

ప్రాథమిక సమాచారం ప్రకారం, ఇండిగో ఉద్యోగిని విధుల కోసం క్యాబ్‌లో శంషాబాద్ విమానాశ్రయానికి వెళ్తోంది. అయితే క్యాబ్ డ్రైవర్ ఎర్రపోగు ప్రశాంత్ కుమార్ నిర్ణయించిన మార్గంలో వెళ్లకుండా కారును నిర్మానుష్య ప్రాంతం వైపు మళ్లించాడు. అనంతరం టాయిలెట్‌కు వెళ్తానని చెప్పి కారు దిగిన అతడు, వెనుక డోర్ ద్వారా మళ్లీ కారులోకి ప్రవేశించి యువతిపై అత్యాచారానికి పాల్పడినట్లు విచారణలో వెల్లడైంది.

ఈ ఘటన అనంతరం బాధితురాలు పోలీసులను ఆశ్రయించి ఫిర్యాదు చేసింది. కేసును అత్యంత ప్రాధాన్యంగా తీసుకున్న పోలీసులు ప్రత్యేక బృందాలను ఏర్పాటు చేసి దర్యాప్తు ప్రారంభించారు. ఘటన జరిగిన ప్రాంతంలోని సీసీటీవీ ఫుటేజ్‌లు, సాంకేతిక ఆధారాలు, వాహనం కదలికల వివరాలను విశ్లేషించి నిందితుడిని గుర్తించారు. అనంతరం అతడిని అదుపులోకి తీసుకుని విచారణ చేపట్టారు.

ఈ ఘటన మహిళల భద్రత, ముఖ్యంగా రాత్రి వేళల్లో క్యాబ్ సేవలను వినియోగించే మహిళల భద్రతపై మరోసారి ప్రశ్నలు లేవనెత్తింది. విమానాశ్రయం వంటి కీలక ప్రాంతాలకు ప్రయాణించే మహిళలకు మరింత భద్రత కల్పించే చర్యలు తీసుకోవాలని పలువురు అభిప్రాయపడుతున్నారు. పోలీసులు కేసు నమోదు చేసి అన్ని కోణాల్లో దర్యాప్తు కొనసాగిస్తున్నారు. బాధితురాలికి అవసరమైన సహాయం అందిస్తున్నట్లు అధికారులు తెలిపారు. నిందితుడిపై చట్టప్రకారం కఠిన చర్యలు తీసుకుంటామని పోలీసులు వెల్లడించారు.