Taslima Nasrin: బంగ్లాదేశ్‌కు చెందిన ప్రముఖ ప్రవాస రచయిత్రి తస్లీమా నస్రీన్ సుమారు 19 ఏళ్ల తర్వాత శుక్రవారం కోల్‌కతా నగరంలో అడుగుపెట్టారు. 2007లో ఆమె రచనలపై తలెత్తిన తీవ్ర నిరసనలు, హింసాత్మక ఘటనల నేపథ్యంలో కోల్‌కతాను విడిచి వెళ్లాల్సి వచ్చిన తస్లీమా, దాదాపు రెండు దశాబ్దాల తర్వాత తిరిగి నగరానికి రావడం ప్రాధాన్యత సంతరించుకుంది. ఓ సాహిత్య కార్యక్రమంలో పాల్గొనేందుకు వచ్చిన ఆమెకు భారీ భద్రత కల్పించారు. మహిళా హక్కులు, భావ వ్యక్తీకరణ స్వేచ్ఛ, మతపరమైన అశాస్త్రీయ ధోరణులపై తన రచనల ద్వారా ప్రపంచవ్యాప్తంగా గుర్తింపు పొందిన తస్లీమా నస్రీన్ 1994 నుంచి ప్రవాస జీవితాన్ని గడుపుతున్నారు. కోల్‌కతా చేరుకున్న అనంతరం మాట్లాడిన ఆమె, ఈ నగరాన్ని ఎప్పుడూ తన సొంత ఇంటిగానే భావిస్తానని, ఎన్నో మధుర జ్ఞాపకాలు ఈ నగరంతో ముడిపడి ఉన్నాయని తెలిపారు. మాతృభూమికి చేరువైన ఈ క్షణం తనకు ఎంతో సంతోషాన్ని, భావోద్వేగాన్ని కలిగిస్తోందని ఆమె పేర్కొన్నారు.

విశ్వంభర, నేషనల్ బ్యూరో: కోల్‌కతా నుండి మేఘాలయాలోని షిల్లాంగ్‌కు బయలుదేరాల్సిన ఇండిగో విమానానికి బాంబు బెదిరింపు రావడంతో విమానాశ్రయంలో కలకలం రేగింది. ఈ ఘటనకు సంబంధించి అధికారులు వెంటనే స్పందించి ప్రయాణికులను సురక్షితంగా కిందకు దింపేశారు. విమానంలో బాంబు ఉందనే సమాచారంతో భద్రతా సిబ్బంది అప్రమత్తమయ్యారు. కోల్‌కతా విమానాశ్రయం నుండి ఉదయం 9:15 గంటలకు బయలుదేరాల్సిన ఇండిగో విమానం కోసం ప్రయాణికులు బోర్డింగ్ ప్రక్రియను పూర్తి చేసుకుంటున్నారు. ఆ సమయంలో విమాన సిబ్బంది టాయిలెట్ కంపార్ట్‌మెంట్‌లో ఒక టిష్యూ పేపర్‌ను గుర్తించారు. ఆ పేపర్‌పై విమానంలో బాంబు అమర్చినట్లు బెదిరింపు నోట్‌ రాసి ఉండటంతో సిబ్బంది వెంటనే అధికారులకు సమాచారం అందించారు.

అప్రమత్తమైన విమానాశ్రయ అధికారులు విమానాన్ని వెంటనే ఐసోలేషన్‌ బే ఏరియాకు తరలించారు. అనంతరం ప్రయాణికులందరినీ విమానం నుండి కిందకు దింపి, వారి సామాగ్రిని క్షుణ్ణంగా తనిఖీ చేశారు. బాంబు నిర్వీర్య దళాలు, పోలీసులు విమానంలోని ప్రతి అంగుళాన్ని జల్లెడ పడుతున్నారు. ఈ ఘటనపై ఇండిగో ప్రతినిధులు స్పందిస్తూ.. ప్రయాణికుల భద్రతకు అత్యంత ప్రాధాన్యత ఇస్తామని, సంబంధిత అధికారులతో కలిసి పూర్తిస్థాయిలో దర్యాప్తు కొనసాగిస్తున్నామని తెలిపారు.