Bhatti Vikramarka: కర్ణాటకలోని రాయచూర్‌ జిల్లాలో ఉన్న హట్టి గోల్డ్‌ మైన్స్‌ను తెలంగాణ డిప్యూటీ సీఎం భట్టి విక్రమార్క సందర్శించారు. ఈ సందర్భంగా గోల్డ్‌ మైన్స్‌లో కొనసాగుతున్న అన్వేషణ, బంగారం ఉత్పత్తి విధానాలను పరిశీలించారు. గనుల్లో ఖనిజాల అన్వేషణ, వెలికితీత, ఉత్పత్తికి సంబంధించిన విధానాలను అధికారులను అడిగి తెలుసుకున్నారు.

తెలంగాణలో ఇటీవల వేలంలో దక్కించుకున్న దేవదుర్గ బంగారం, రాగి బ్లాక్‌ల అన్వేషణకు హట్టి గోల్డ్‌ మైన్స్‌లో ఉన్న అనుభవాలు, సాంకేతిక విధానాలు ఉపయోగపడతాయని భట్టి విక్రమార్క తెలిపారు. బంగారం, రాగి వంటి ఖనిజాల అన్వేషణలో హట్టి గోల్డ్‌ మైన్స్‌ అనుభవాలను అధ్యయనం చేయడం ద్వారా తెలంగాణలో ఖనిజ సంపదను మరింత సమర్థవంతంగా వెలికితీసే అవకాశం ఉంటుందని పేర్కొన్నారు.

సింగరేణి సంస్థను కేవలం బొగ్గు ఉత్పత్తికే పరిమితం చేయకుండా.. బంగారం, రాగి వంటి ఇతర విలువైన ఖనిజాల ఉత్పత్తి, అన్వేషణ వైపు కూడా విస్తరించేందుకు ప్రభుత్వం కృషి చేస్తోందని భట్టి విక్రమార్క తెలిపారు. రాష్ట్రంలో అందుబాటులో ఉన్న ఖనిజ వనరులను గుర్తించి వాటిని సద్వినియోగం చేసుకోవడం ద్వారా సింగరేణి కార్యకలాపాలను మరింత విస్తరించాలనే లక్ష్యంతో ప్రభుత్వం ముందుకు సాగుతోందన్నారు.

హట్టి గోల్డ్‌ మైన్స్‌ సందర్శనలో అక్కడి అన్వేషణ, ఉత్పత్తి ప్రక్రియలను పరిశీలించిన భట్టి విక్రమార్క.. తెలంగాణలో చేపట్టనున్న బంగారం, రాగి ఖనిజాల అన్వేషణకు అవసరమైన అంశాలను తెలుసుకున్నారు. దేవదుర్గ బ్లాక్‌లతో పాటు రాష్ట్రంలోని ఇతర ఖనిజ వనరుల అభివృద్ధికి ఈ అనుభవాలు ఉపయోగపడతాయని తెలిపారు.

Telangana Politics: మహబూబాబాద్‌ జిల్లా గూడూరు మండల కేంద్రంలో జరిగిన స్మార్ట్‌ రేషన్‌ కార్డుల పంపిణీ కార్యక్రమానికి ఏర్పాటు చేసిన ఫ్లెక్సీ ఇప్పుడు కాంగ్రెస్‌ వర్గాల్లో చర్చకు దారితీసింది. కార్యక్రమానికి సంబంధించిన ఫ్లెక్సీలో ముఖ్యమంత్రి రేవంత్‌రెడ్డి, డిప్యూటీ సీఎం భట్టి విక్రమార్క, మంత్రులు సీతక్క, ఉత్తమ్‌కుమార్‌రెడ్డి, పొంగులేటి శ్రీనివాస్‌రెడ్డి, ఎంపీలు బలరాం నాయక్‌, వేం నరేందర్‌రెడ్డి తదితరుల ఫోటోలను ఏర్పాటు చేశారు. అయితే మహబూబాబాద్‌ జిల్లా మంత్రిగా ఉన్న కొండా సురేఖ ఫోటో మాత్రం ఫ్లెక్సీలో కనిపించకపోవడం చర్చనీయాంశంగా మారింది.

ప్రభుత్వ కార్యక్రమంలో జిల్లా మంత్రికి సంబంధించిన ఫోటో లేకపోవడం పట్ల కాంగ్రెస్‌ వర్గాల్లో వివిధ రకాల చర్చలు జరుగుతున్నాయి. కార్యక్రమం నిర్వహించిన వారు ఫ్లెక్సీలో ఆమె ఫోటోను ఎందుకు ఏర్పాటు చేయలేదనే ప్రశ్నలు వినిపిస్తున్నాయి. ఒకవైపు ఇతర మంత్రులు, ప్రజాప్రతినిధుల ఫోటోలను ఏర్పాటు చేసి.. అదే జిల్లాకు చెందిన మంత్రి కొండా సురేఖ ఫోటోను మాత్రం పెట్టకపోవడం వెనుక కారణమేంటనే చర్చ మొదలైంది.

ప్రభుత్వ కార్యక్రమాల ఫ్లెక్సీల విషయంలో ప్రోటోకాల్‌, స్థానిక ప్రజాప్రతినిధుల ప్రాధాన్యత వంటి అంశాలు పాటించాల్సి ఉంటుందని పలువురు పేర్కొంటున్నారు. తాజాగా గూడూరులో జరిగిన కార్యక్రమంలో జిల్లా మంత్రి ఫోటో కనిపించకపోవడం రాజకీయంగా ఎలాంటి సంకేతాలకు దారితీస్తుందనే చర్చ కూడా కాంగ్రెస్‌ శ్రేణుల్లో జరుగుతోంది. అయితే ఫ్లెక్సీలో కొండా సురేఖ ఫోటో ఎందుకు లేదన్న దానిపై సంబంధిత నిర్వాహకుల నుంచి స్పష్టత రావాల్సి ఉంది.

Mallu Bhatti Vikramarka: తెలంగాణ డిప్యూటీ సీఎం, ఆర్థిక శాఖ మంత్రి మల్లు భట్టి విక్రమార్క అమెరికాలోని శాన్‌జోస్‌లో క్వాంటమ్‌స్కేప్ ప్రెసిడెంట్, సీఈవో డాక్టర్ శివ శివరామ్‌తో సమావేశమయ్యారు. ఈ సందర్భంగా తదుపరి తరం సాలిడ్-స్టేట్ బ్యాటరీ టెక్నాలజీపై ఇరువురు విస్తృతంగా చర్చించారు. ఎలక్ట్రిక్ వాహనాల రంగంలో వేగంగా మారుతున్న సాంకేతికత, భవిష్యత్ అవసరాలకు అనుగుణంగా అభివృద్ధి చెందుతున్న బ్యాటరీ టెక్నాలజీలపై భట్టి విక్రమార్క ఆసక్తి కనబరిచారు.

ప్రపంచవ్యాప్తంగా అభివృద్ధి చెందుతున్న ఎలక్ట్రిక్ వాహనాల సప్లై చైన్పైనా సమావేశంలో చర్చ జరిగింది. బ్యాటరీల తయారీ, సాంకేతిక పరిశోధన, ముడి పదార్థాల సరఫరా, అధునాతన తయారీ సామర్థ్యాలకు సంబంధించిన అంశాలను పరిశీలించారు. తెలంగాణలో అభివృద్ధి చెందుతున్న క్లీన్‌టెక్ ఎకోసిస్టమ్‌కు అనుగుణంగా అంతర్జాతీయ సంస్థలతో భాగస్వామ్య అవకాశాలను అన్వేషించడంపై కూడా చర్చించారు.

ప్రత్యేకంగా ఆర్‌అండ్‌డీ, అధునాతన తయారీ రంగాల్లో ప్రత్యక్ష భాగస్వామ్యాలకు ఉన్న అవకాశాలను భట్టి విక్రమార్క, శివ శివరామ్ పరిశీలించారు. భవిష్యత్‌లో క్లీన్ ఎనర్జీ, ఎలక్ట్రిక్ మొబిలిటీ, అధునాతన బ్యాటరీ సాంకేతికతలకు ప్రాధాన్యత పెరుగుతున్న నేపథ్యంలో ఈ సమావేశం ప్రాధాన్యత సంతరించుకుంది.

తెలంగాణలో క్లీన్‌టెక్, ఎలక్ట్రిక్ వాహనాలు, అధునాతన తయారీ రంగాల్లో పెట్టుబడులు, పరిశోధన, సాంకేతిక భాగస్వామ్యాలను ప్రోత్సహించే దిశగా ఈ చర్చలు ఉపయోగపడే అవకాశం ఉంది. అంతర్జాతీయ స్థాయి సంస్థలతో సాంకేతిక సహకారం ద్వారా రాష్ట్రంలో కొత్త అవకాశాలను సృష్టించేందుకు ప్రభుత్వం కృషి చేస్తోందని ఈ సమావేశం ద్వారా స్పష్టమవుతోంది.

Telangana News: ఖమ్మం జిల్లా మధిర నియోజకవర్గంలో భూ వివాదానికి సంబంధించిన ఆరోపణలు కలకలం రేపుతున్నాయి. చింతకాని మండలం నాగులవంచ గ్రామానికి చెందిన రైతు జొన్నలగడ్డ మల్లికార్జునరావు తన భూమి విషయంలో కొంతకాలంగా వేధింపులు ఎదుర్కొంటున్నట్లు ఆరోపించారు. తన భూమిని రోడ్డు నిర్మాణం కోసం తీసుకుంటామని చెబుతూ, ఇతర భూములను వదిలి తన భూమినే లక్ష్యంగా చేసుకుంటున్నారని రైతు ఆవేదన వ్యక్తం చేసినట్లు సమాచారం.

ఈ వ్యవహారంలో మార్కెట్ కమిటీ చైర్మన్, కాంగ్రెస్ మండల అధ్యక్షుడు అంబటి వెంకటేశ్వరరావు తనను వేధిస్తున్నారని రైతు ఆరోపించారు. తనపై దాడి చేయడంతో పాటు, ఈ విషయంపై ప్రశ్నిస్తే కేసులు పెడతామని బెదిరిస్తున్నారని ఆయన వాపోయారు. “మా వెనక భట్టి విక్రమార్క ఉన్నాడు.. ఏం పీక్కుంటావో పీక్కో” అంటూ తనను బెదిరించినట్లు రైతు ఆరోపించారు. రాజకీయ పలుకుబడిని ఉపయోగించి తన భూమిని లాక్కునేందుకు ప్రయత్నిస్తున్నారని ఆయన ఆవేదన వ్యక్తం చేశారు.

తనకు న్యాయం జరగడం లేదనే మనస్తాపంతో రైతు పురుగుల మందు తాగి ఆత్మహత్యాయత్నానికి పాల్పడినట్లు సమాచారం. కుటుంబ సభ్యులు, స్థానికులు వెంటనే స్పందించి అతడిని చికిత్స కోసం ఆస్పత్రికి తరలించారు. ప్రస్తుతం రైతు ఆరోగ్య పరిస్థితిపై వివరాలు తెలియాల్సి ఉంది. ఈ ఘటనతో గ్రామంలో తీవ్ర ఆందోళన నెలకొంది.

తన భూమిని రక్షించాలని, తనపై వేధింపులు, దాడులకు పాల్పడిన వారిపై చర్యలు తీసుకోవాలని రైతు కుటుంబ సభ్యులు అధికారులను కోరుతున్నారు. భూ వివాదాన్ని అధికారులు నిష్పక్షపాతంగా విచారించి వాస్తవాలను తేల్చాలని గ్రామస్తులు డిమాండ్ చేస్తున్నారు. రైతు చేసిన ఆరోపణలపై సంబంధిత అధికారులు, కాంగ్రెస్ నాయకుల స్పందన తెలియాల్సి ఉంది. భూ సమస్య కారణంగా రైతు ఆత్మహత్యాయత్నానికి పాల్పడిన ఘటనపై సమగ్ర విచారణ జరిపి బాధ్యులపై చర్యలు తీసుకోవాలని బాధిత కుటుంబం కోరుతోంది.

Bhatti Vikramarka Singareni News: సింగరేణి థర్మల్ పవర్ ప్రాజెక్ట్ (ఎస్‌టీపీపీ) కోసం కేటాయించిన నైనీ కోల్ బ్లాక్ నుంచి తొలి రైల్వే రేక్ ద్వారా బొగ్గు తెలంగాణకు చేరుకోవడం సింగరేణి చరిత్రలో ఒక చారిత్రాత్మక ఘట్టం అని తెలంగాణ డిప్యూటీ ముఖ్యమంత్రి భట్టి విక్రమార్క పేర్కొన్నారు. ఈ సందర్భంగా సింగరేణి యాజమాన్యానికి, కార్మిక సోదరులకు ఆయన హృదయపూర్వక అభినందనలు తెలిపారు. ఈ విజయంతో సింగరేణి స్వయం సమృద్ధి దిశగా మరో కీలక అడుగు వేసిందని ఆయన అభిప్రాయపడ్డారు.

తెలంగాణ రాష్ట్ర విద్యుత్ అవసరాలను తీర్చడంలో సింగరేణి సంస్థ కీలక పాత్ర పోషిస్తోందని భట్టి విక్రమార్క అన్నారు. నాణ్యమైన బొగ్గు సరఫరా ద్వారా విద్యుత్ ఉత్పత్తి మరింత సమర్థవంతంగా సాగుతుందని, దీనివల్ల రాష్ట్ర ఇంధన భద్రత మరింత బలోపేతం అవుతుందని పేర్కొన్నారు. నైనీ కోల్ బ్లాక్ నుంచి బొగ్గు రవాణా ప్రారంభం కావడం సింగరేణి సంస్థ అభివృద్ధిలో మరో మైలురాయిగా నిలుస్తుందని చెప్పారు.

ముఖ్యమంత్రి రేవంత్ రెడ్డి నాయకత్వంలో సింగరేణిని అన్ని రంగాల్లో మరింత బలోపేతం చేయడానికి రాష్ట్ర ప్రభుత్వం పూర్తి సహకారం అందిస్తోందని డిప్యూటీ సీఎం స్పష్టం చేశారు. ఆధునిక సాంకేతికతను అందిపుచ్చుకుని ఉత్పత్తి సామర్థ్యాన్ని పెంచడంతో పాటు కార్మికుల సంక్షేమానికి ప్రభుత్వం అత్యంత ప్రాధాన్యత ఇస్తోందన్నారు. సింగరేణి మరింత అభివృద్ధి చెందేందుకు అవసరమైన ప్రతి చర్యను ప్రభుత్వం చేపడుతుందని హామీ ఇచ్చారు.

ప్రపంచంలోని ప్రముఖ మైనింగ్ సంస్థలతో పోటీపడే స్థాయికి సింగరేణిని తీర్చిదిద్దడమే ప్రభుత్వ లక్ష్యమని భట్టి విక్రమార్క తెలిపారు. ఉత్పాదకత, సాంకేతికత, పారదర్శకత, కార్మిక సంక్షేమం వంటి అన్ని రంగాల్లో సింగరేణిని ఆదర్శ సంస్థగా నిలపాలని ప్రభుత్వం కృషి చేస్తోందన్నారు. సంస్థ అభివృద్ధికి అధికారులు, ఉద్యోగులు, కార్మికులు ఇదే స్ఫూర్తితో పనిచేయాలని ఆయన పిలుపునిచ్చారు.

కేసీఆర్ పాలనను మర్చిపోయావా అంటూ మాజీ మంత్రి హరీశ్ రావుకు సీఎం భట్టి విక్రమార్క కౌంటర్ వేశారు. బీఆర్ ఎస్ ప్రభుత్వ హయాంలో గత పదేండ్లుగా ఎన్నో దారుణాలు వెలుగు చూశాయంటూ ఆవేదన వ్యక్తం చేశారు. కాంగ్రెస్ ప్రభుత్వంలో లా అండ్ ఆర్డర్ కే ఎక్కువ ప్రాధాన్యత ఇస్తున్నామని.. అందుకోసం ఏదైనా చేస్తామంటూ తెలిపారు. 

బ్యాంకర్ల వార్షిక రుణప్రణాళికను ఆయన ఆవిష్కరించారు. బ్యాంకర్లకు సామాజిక, మానవీయ కోణం ఉండాలన్నారు. పెట్టుబడులకు స్వర్గధామం హైదరాబాద్ అన్నారు. రాష్ట్రంలో పేదలు, మధ్యతరగతి వారికి రుణాలు ఇచ్చేందుకు బ్యాంకర్లు ముందుకు రావాలటూ తెలిపారు భట్టి విక్రమార్క. త్వరలోనే తెలంగాణకు రీజినల్ రింగ్ రోడ్డు రాబోతోందని.. దాంతో తెలంగాణ రూపు రేఖలే మారిపోతాయంటూ తెలిపారు భట్టి విక్రమార్క. 

ఇంత చేస్తున్నా సరే తమను బీఆర్ ఎస్ నేతలు విమర్శలు గుప్పిస్తున్నారని.. కానీ కేసీఆర్ కాళేశ్వరం కడితే కూలిపోయిందంటూ ఆరోపించారు భట్టి. కేసీఆర్ పానలో జరిగినన్ని అక్రమాలు ఎప్పుడూ జరగలేదని.. కాబట్టి కేసీఆర్ చేసిన పాపాలకు ఇప్పుడు మేం పరిష్కారాలు చూపిస్తున్నామంటూ తెలిపారు భట్టి విక్రమార్క. కక్ష సాధింపు కోసం కమిషన్ వేయలేదని.. గతంలో విద్యుత్ మంత్రిగా పనిచేసిన జగదీశ్ రెడ్డి వేయమంటేనే వేశామని తెలిపారు భట్టి విక్రమార్క. 

ఎన్నికల కోడ్ ముగిసిందని గుర్తుచేస్తూ అధికారులు అభివృద్ధిపై దృష్టిసారించి జవాబుదారీతనంతో పనిచేయాలని డిప్యూటీ సీఎం మల్లు భట్టి విక్రమార్క సూచించారు. ఖమ్మం జిల్లా మధిర క్యాంపు కార్యాలయంలో ఆదివారం మధిర అభివృద్ధిపై అధికారులతో ఏర్పాటు చేసిన సమీక్షా సమావేశంలో ఆయన మాట్లాడారు.  ఇచ్చిన మాట ప్రకారం మధిరను దేశంలో నెంబర్ వన్‌ నియోజకవర్గంగా తీర్చిదిద్దుతామన్నారు. మధిరలో అండర్ డ్రైనేజీల నిర్మాణానికి రూ.128 కోట్ల నిధులను విడుదల చేస్తున్నట్లు వెల్లడించారు. 

అదేవిధంగా రాజీవ్ ఆరోగ్యశ్రీ పథకం కింద, యాంజియోగ్రామ్, పార్కిన్సన్స్, వెన్నునొప్పి వంటి ఖరీదైన వ్యాధుల చికిత్సలు, ఆరోగ్యశ్రీ పథకం కింద చికిత్సల ప్యాకేజీ ధరలను పెంచుతూ ప్రభుత్వం నిర్ణయం తీసుకున్న విషయం తెలిసిందే. ఇందుకు సంబంధించి రూ.497.29 కోట్లు అవసరం కాగా ఈ నిధులను విడుదల చేస్తూ డిప్యూటీ సీఎం, ఆర్థిక మంత్రి భట్టి విక్రమార్క శనివారం ఉత్తర్వులు జారీ చేశారు. రాజీవ్ ఆరోగ్యశ్రీ పథకం కింద ప్రస్తుతం ఉన్న పథకాలకు సంబంధించి నూతన చికిత్సా విధానాలు, ఆర్థిక సవరణల కోసం రాష్ట్ర సచివాలయంలో భట్టి విక్రమార్కతో సమావేశం జరిగింది.2007లో కాంగ్రెస్ సర్కార్ ప్రవేశపెట్టిన ఆరోగ్య శ్రీ పథకం కింద 2.84 కోట్ల మంది లబ్ధిదారులున్నారు. ఈ పథకం ద్వారా వారికి 10 లక్షల వరకు ఆర్థిక సాయం అందనుంది. రాష్ట్రంలోని 1402 ఆసుపత్రుల ద్వారా ఈ సదుపాయం కల్పించబడింది.

ప్రస్తుతం ఈ పథకంలో 1672 చికిత్సా విధానాలు అందుబాటులో ఉన్నాయి. ఇందులో వైద్య నిపుణుల సూచనల మేరకు 1375 ప్రొసీజర్లకు ప్యాకేజీ ధరలను పెంచుతూ డిప్యూటీ సీఎం నిర్ణయించారు. యాంజియోగ్రామ్, పార్కిన్సన్స్ సన్, వెన్నుపూసలకు సంబంధించి ఆరోగ్యశ్రీలో అమలు చేయని 65 అధునాతన చికిత్స విధానాలను ఇక నుంచి ఆరోగ్యశ్రీలో అమలు చేయాలని నిర్ణయించారు. వీటితో పాటు ప్రస్తుతం ఆయుష్మాన్ భారత్‌లో ఉన్న 98 చికిత్సా విధానాలను రాజు ఆరోగ్యశ్రీలో చేర్చడం వల్ల ప్రభుత్వానికి దాదాపు 189.83 కోట్లు ఖర్చు, 65 కొత్త చికిత్సలను అంగీకరించడం వల్ల ప్రభుత్వం 158.20 కోట్లు ఖర్చు,  చేస్తుంది.

రాజ్ భవన్‌లో గవర్నర్ రాధాకృష్ణన్‌తో సీఎం రేవంత్ రెడ్డి భేటీ అయ్యారు. ఆయనతో పాటు డిప్యూటీ సీఎం భట్టి విక్రమార్క ఉన్నారు. తెలంగాణ రాష్ట్ర ఆవిర్భావ వేడుకలకు రావాలని గవర్నర్‌ను ఆహ్వానించారు. ఈ సందర్భంగా పుష్పగుచ్ఛం అందజేసి సాదరంగా ఆహ్వానం పలికారు.కాగా జూన్ 2న తెలంగాణ 10 ఏళ్ల ఆవిర్భావ వేడుకలను రేవంత్ సర్కార్ ఘనంగా నిర్వహిస్తోంది. డిసెంబర్ 6, 2023వ తేదీన తెలంగాణ రెండవ ముఖ్యమంత్రిగా రేవంత్ రెడ్డి ప్రమాణ స్వీకారం చేశారు. 

జూన్ 02, 2024న రాష్ట్ర అవతరణ దినోత్సవ వేడుకలు సికింద్రాబాద్ పరేడ్ గ్రౌండ్‌లో ఘనంగా నిర్వహించాలని కాంగ్రెస్ ప్రభుత్వం నిర్ణయించింది. ఈ మేరకు తెలంగాణ మాజీ ముఖ్యమంత్రి కేసీఆర్, తెలంగాణ ఇచ్చిన సోనియాగాంధీని ప్రత్యేకంగా ఆహ్వానిస్తున్నారు. ఇప్పటికే రాష్ట్ర అవతరణ దినోత్సవ ఏర్పాట్లను భారీగా చేస్తున్నారు. తాజాగా తెలంగాణ సీఎం రేవంత్ రెడ్డి , డిప్యూటీ సీఎం భట్టి విక్రమార్కలు కలిసి రాజ్ భవన్‌లో గవర్నర్ రాధా కృష్ణన్‌ను  కలిశారు. 

ఆదివారం ఉదయం, సాయంత్రం రెండు పూటలా వేడుకలను నిర్వహించేందుకు ప్రభుత్వం ప్రణాళికలు సిద్ధం చేసింది. జూన్ 2న ఉదయం 9.30గంటలకు గన్ పార్క్ అమరవీరుల స్తూపం వద్ద అమరవీరులకు నివాళులు, 10గంటలకు పరేడ్ గ్రౌండ్‌లో పోలీసుల కవాతులు నిర్వహించనున్నారు. అదేవిధంగా సాయంత్రం ట్యాంక్ బండ్‌పై తెలంగాణ ఆవిర్భావ వేడుకలను ప్రారంభించనున్నారు. రాష్ట్రానికి సంబంధించిన హస్తకళలు, ప్రత్యేక ఉత్పత్తులు, వివిధ రకాల ఫుడ్ స్టాల్స్‌ను ట్యాంక్ బండ్‌పై ఏర్పాటు చేశారు. సాయంత్రం 6.30గంటలకు సీఎం అక్కడికి చేరుకుటారు.

అకాల వర్షాలతో తీవ్ర ఆందోళనలో ఉన్న రైతులకు తెలంగాణ డిప్యూటీ సీఎం భట్టి విక్రమార్క గుడ్‌న్యూస్ చెప్పారు. ఇవాళ (మంగళవారం) హైదరాబాద్‌లోని గాంధీభవన్‌లో ఆయన మీడియాతో మాట్లాడారు. ధాన్యం కొనుగోలు కేంద్రాల్లో జాప్యం జరగకుండా చూస్తామని హామీ ఇచ్చారు. ధాన్యం సేకరించిన వెంటనే రైతుల ఖాతాల్లో డబ్బు జమ చేస్తామన్నారు. 

తడిచిన ధాన్యం కూడా కొంటున్నామని తెలిపారు. ధాన్యం కొనుగోలు విషయంలో ప్రభుత్వంపై దుష్ప్రచారం చేస్తున్నారని భట్టి విక్రమార్క ఆగ్రహం వ్యక్తం చేశారు. నేటి యువత సాంకేతికతను అందిపుచ్చుకోవాలని.. వాతావరణ శాఖ సూచనలను రైతులకు అందించాలని సూచించారు. వర్ష సూచనపై ఎప్పటికప్పుడు రైతులకు సమాచారం ఇవ్వాలని పిలుపునిచ్చారు. 

అబద్ధాలు చెప్పడం బీఆర్ఎస్ నేతలకు అలవాటు అని ఎద్దేవా చేశారు. 15 రోజుల ముందుగానే ధాన్యం కొంటున్నామని తెలిపారు. గతంలో కంటే ఎక్కువగా 7,215 కొనుగోలు కేంద్రాలు ప్రారంభించామన్నారు. గత ప్రభుత్వం కంటే ఎక్కువగా తాము ధాన్యం కొనుగోలు చేశామన్నారు. తడిచిన, మొలకెత్తిన ధాన్యాన్ని గత ప్రభుత్వం కొనలేదన్నారు. మూడు రోజుల్లోనే రైతుల ఖాతాల్లో డబ్బులు జమచేస్తామని, రైతులెవరూ అధైర్యపడొద్దని భరోసా ఇచ్చారు.

సన్నబియ్యానికే బోనస్ అనలేదు: భట్టి 

సన్న బియ్యానికే రూ.500 బోనస్ ఇస్తామని తాము అనలేదని డిప్యూటీ సీఎం భట్టి విక్రమార్క స్పష్టం చేశారు. రూ.500 బోనస్ ఇచ్చే పథకాన్ని సన్న బియ్యంతో మొదలుపెడుతామని చెప్పామని తెలిపారు.  రైతులెవరూ ఆందోళన చెందాల్సిన అవసరం లేదని, తమది రైతు ప్రభుత్వమని వెల్లడించారు. తడిచినా, మొలకెత్తినా చివరి గింజ వరకు కొంటామని స్పష్టం చేశారు.