తెలంగాణ ప్రజలు రేవంత్ రెడ్డి సర్కార్ మరో గుడ్ న్యూస్ చెప్పబోతోంది. ఇప్పటికే ఇచ్చిన ఆరు గ్యారెంటీల్లో కొన్నింటిని అమలు చేసిన రేవంత్.. మరికొన్నింటిపై దృష్టి సారిస్తున్నారు. ఇప్పటికే కొన్నింటికి ఓకే కూడా చెప్పారంట. అయితే ఎన్నికల కోడ్ ముగిసింది కాబట్టి.. ఇప్పుడు మిగతా గ్యారెంటీల అమలుపై దృష్టి సారిస్తున్నట్టు తెలుస్తోంది. ఇందులో ముఖ్యమైనది కొత్త రేషన్ కార్డుల జారీ. ఇప్పటికే వీటికోసం కసరత్తులు స్టార్ట్ చేశారంట. 

దీనిపై ఇప్పటి వరకు అధికారికంగా ప్రకటన రాకపోయినా.. మౌకిక ఆదేశాలతో అధికారులు కసరత్తులు స్టార్ట్ చేశారు. జీహెచ్ ఎంసీ పరిధిలోని మూడు జిల్లాల్లో ఇంటింటి సర్వే చేయాలని పౌర సరఫరాల అధికారులను ఆదేశించారు. ఇక మిగతా జిల్లాల్లో మాత్రం మహిళా సంఘాలను రంగంలోకి దించినట్టు తెలుస్తోంది. గ్రామాల్లో కార్యదర్శులు, అంగన్ వాడీ టీచర్లు, ఆశా కార్యకర్తలు ఈ బాధ్యతలను చూస్తున్నారంట. ఇంటింటికీ వెళ్లి ఎంత మంది ఉన్నారో తెలుసుకుంటున్నారు. 

ఆ వివరాల ఆధారంగా ఎన్ని రేషన్ కార్డులు ఇవ్వాల్సి వస్తుందనేది తెలుసుకోబోతున్నారు. ఇక ప్రజా పాలనలో భాగంగా కొత్త రేషన్ కార్డుల కోసం లక్షలాది మంది అప్లై చేసుకున్నారు. ఇంత మందిలో ఎవరికి ఇవ్వాలి, అర్హులను ఎలా గుర్తించాలనే దానిపై ప్రస్తుతం అధికారులు కసరత్తులు చేస్తున్నారు.

మంత్రి పొంగులేటి శ్రీనివాస్ రెడ్డి ఇందిరమ్మ ఇళ్లు, కొత్త రేషన్ కార్డులపై కీలక వ్యాఖ్యలు చేశారు. పాలేరు నియోజకవర్గంలో ‘ప్రజలవద్దకే మంత్రి’ కార్యక్రమంలో ఆయన పాల్గొని మాట్లాడారు. ఇళ్లు లేని ప్రతీ ఇక్కరికీ ఇందిరమ్మ ఇళ్లు ఇస్తామని స్పష్టం చేశారు. అదేవిధంగా అందరికీ కొత్త రేషన్ కార్డులు, పెంచిన పింఛన్లు అందజేస్తామని హామీ ఇచ్చారు. 

 నియంతృత్వ పాలన నుంచి మార్పు కావాలనే ఇందిరమ్మ రాజ్యం తెచ్చుకున్నామని మంత్రి శ్రీనివాస్ రెడ్డి వ్యాఖ్యానించారు. గ్రామాల్లో పాఠశాల, రోడ్లు, కమ్యూనిటీ హాళ్ల నిర్మాణాలను త్వరలోనే పూర్తి చేయిస్తామన్నారు. పాలేరు నియోజకవర్గం తన సొంత ఇల్లు అని, ఎన్నికల కోడ్ పూర్తవగానే నియోజకవర్గంలో అభివృద్ధి పనులు మొదలుపెడతామన్నారు. 

ప్రజల సమస్యలను తీర్చడం తమ ప్రభుత్వ బాధ్యత అని మంత్రి అన్నారు. ప్రజలు అడిగిన వాటితో పాటు అడగని వాటినీ ఇస్తామన్నారు. భవిష్యత్తులో ఏ సమస్య వచ్చినా ఇందిరమ్మ కమిటీల ద్వారా తనకు తెలియజేయాలని సూచించారు. ప్రజలందరూ సంతోషంగా ఉండటానికి పెద్దకొడుకులా పనిచేస్తానని మంత్రి పొంగులేని శ్రీనివాస్ రెడ్డి అన్నారు.