సుచిత్రలోని భూవివాదంపై మాటల తూటాలు పేలుతున్నాయి. ఈ భూమి విషయంలో తన దగ్గరు ఉన్నవి తప్పుడు డాక్యుమెంట్స్ అని తేలితే తాను రాజీనామా చేస్తానని మాజీ మంత్రి మల్లారెడ్డి అన్నారు. ఫేక్ డాక్యుమెంట్స్ కాకపోతే కాంగ్రెస్ ఎమ్మెల్యే, ప్రభుత్వ విప్ లక్ష్మణ్ రాజీనామాకు సిద్దమా? అని సవాల్ విసిరారు. ఈ భూమిలో సర్వే ఇప్పుడే పూర్తి అయిందని కొన్ని రోజులు ఆగితే ఎవరివి ఫేక్ డాక్యుమెంట్స్ అని తేలిపోతుందని చెప్పారు. తన దగ్గరున్న ఒరిజినల్స్ డాక్యుమెంట్స్‌తో సోమవారం సీఎం రేవంత్ రెడ్డి, రెవెన్యూ మంత్రి, కలెక్టర్లను కలుస్తానని చెప్పారు.  

నిన్న జరిగిన ఈ భూ వివాదంలో మాజీ మంత్రి మల్లారెడ్డి ఎమ్మెల్యే లక్ష్మణ్ పేరును ప్రస్తావించారు. దీంతో ఆయన కూడా అదే స్థాయిలో ఘాటుగా స్పందించారు. మల్లారెడ్డి మంత్రిగా ఉన్న సమయంలో అధికారాన్ని అడ్డుపెట్టుకొని దౌర్జన్యంగా భూమిని అక్రమించారని ఆరోపించారు. తాము కొన్న భూమిని ఫేక్ డాక్యుమెంట్లు అని మల్లారెడ్డి చెప్తున్నారని అన్నారు. కోర్టు ఇచ్చిన ఇంజక్షన్ ఆర్డర్‌ను వెకేట్ చేయించుకోలేదన్నారు. గతంలో తాము పోలీసులకు, మున్సిపల్ కమీషనర్‌కు పిర్యాదు చేసినా అధికారులు పట్టించుకోలేదని లక్ష్మణ్ ఆరోపించారు. దీంతో లక్ష్మణ్ కు మల్లారెడ్డి సవాల్ చేశారు. 

ప్రస్తుతం తెలంగాణలో మల్లారెడ్డి భూ వివాదం హాట్ టాపిక్‌గా మారింది. సుచిత్రలో రెవెన్యూ అధికారులు సర్వే నిర్వహించారు. రెండు వర్గాల సమక్షంలో పూర్తిగా హద్దులను సర్వే చేశారు అధికారులు. సర్వే నెంబర్ 82, 83ను సర్వే విస్తీర్ణాన్ని రెవెన్యూ అధికారులు గుర్తించారు. ఈ సర్వే రిపోర్ట్‌ను సిద్ధం చేసే పనిలో అధికారులు నిమగ్నమయ్యారు.

మాజీ మంత్రి, మేడ్చల్ ఎమ్మెల్యే చామకూర మల్లారెడ్డి భూవివాదంపై విచారణ కొనసాగుతోంది. సుచిత్రలోని 82, 83 సర్వే నంబర్లలోని స్థలానికి వెళ్లిన రెవెన్యూ అధికారులు సంబంధిత పత్రాలను పరిశీలించి భూ సర్వే చేపట్టారు. ఎలాంటి వివాదం తలెత్తకుండా భారీ పోలీసు బందోబస్తు ఏర్పాటు చేశారు. ఇరువర్గాల ఫిర్యాదు మేరకు పోలీసులు కేసు నమోదు చేసి వాంగ్మూలం నమోదు చేశారు. 

ఇదిలా ఉండగా నోటీసులు ఇవ్వకుండా సర్వే చేయడాన్ని ఎమ్మెల్యే మర్రి రాజశేఖర్ రెడ్డి రెవెన్యూ అధికారులను తప్పుబట్టారు. 13ఏళ్ల కిందట భూమి కొనుగోలు చేసి ఆస్తిపన్ను చెల్లిస్తున్నామని చెప్పారు. 2011లో తాను, మల్లారెడ్డి ఈ భూమిని కొనుగోలు చేశానని.. ఆ సమయంలో రాజకీయాల్లోకి రాలేదని స్పష్టం చేశారు. చట్టపరంగా రావాలని కొందరు వివాదం సృష్టిస్తున్నారని వాపోయారు. 

మాజీ మంత్రి మల్లారెడ్డి అల్లుడు రాజశేఖర్ రెడ్డికి సంబంధించిన భూమి కోర్టు వివాదంలో ఉన్న విషయం తెలిసిందే. ఈ క్రమంలో మల్లారెడ్డి, ఎమ్మెల్యే రాజశేఖర్ రెడ్డి తమ అనుచరులతో కలిసి ఈ స్థలాన్ని కొందరు కబ్జా చేస్తున్నారని ఆరోపిస్తూ ఆ స్థలంలో వేసిన బారికేడ్లను నిన్న తొలగించారు. దీంతో ఉద్రిక్తత పరిస్థితి చోటుచేసుకోవడంతో పోలీసులు మల్లారెడ్డిని అదుపులోకి తీసుకున్న విషయం తెలిసిందే.