Malkajgiri Police: హైదరాబాద్‌లో కల్తీ ఆహార పదార్థాల తయారీ, విక్రయాలపై M-FAST, SOT, స్థానిక పోలీసులు సంయుక్తంగా భారీ దాడులు నిర్వహించారు. ఉప్పల్‌లోని V. Mehak Masalas, మేడిపల్లిలోని Sai Thirumala Enterprisesపై నిర్వహించిన తనిఖీల్లో భారీగా కల్తీ ఆహార ఉత్పత్తులు, తయారీకి ఉపయోగించే యంత్రాలను స్వాధీనం చేసుకున్నారు. మొత్తం 11,220 కిలోల ఆహార ఉత్పత్తులు, యంత్ర సామగ్రి కలిపి సుమారు రూ.1.50 కోట్ల విలువైన సరుకును అధికారులు స్వాధీనం చేసుకున్నట్లు తెలిపారు.

ఆహార పదార్థాల నాణ్యతను ఉద్దేశపూర్వకంగా తగ్గించి, నాసిరకం పదార్థాలను కలిపి ప్రజలకు విక్రయిస్తున్నారన్న ఆరోపణల నేపథ్యంలో ఈ దాడులు నిర్వహించినట్లు సమాచారం. కల్తీ ఆహార తయారీ, మిస్‌బ్రాండింగ్‌కు సంబంధించిన వ్యవహారంలో ఇద్దరిని పోలీసులు అరెస్ట్‌ చేసినట్లు తెలిపారు. స్వాధీనం చేసుకున్న ఆహార పదార్థాలు, యంత్రాలపై అధికారులు తదుపరి పరిశీలనలు చేపట్టారు.

ప్రజలు ప్రతిరోజూ వినియోగించే పాలు, నెయ్యి, పనీర్‌, మసాలాలు, ఇతర ఆహార పదార్థాల్లో కల్తీని అరికట్టడమే లక్ష్యంగా M-FAST ప్రత్యేక దృష్టి సారిస్తోంది. ఆహార పదార్థాల నాణ్యతను ఉద్దేశపూర్వకంగా దెబ్బతీసి ప్రజల ఆరోగ్యంతో చెలగాటమాడే చర్యలను ఏమాత్రం సహించబోమని అధికారులు స్పష్టం చేశారు. కల్తీ ఆహార పదార్థాల తయారీ, విక్రయాలపై నిరంతర తనిఖీలు కొనసాగుతాయని తెలిపారు.

Hyderabad RTC Bus: హైదరాబాద్‌లోని ఉప్పల్ నల్లచెరువు కట్ట వద్ద ఏర్పాటు చేసిన తాత్కాలిక ఆర్టీసీ బస్‌స్టాండ్ దుస్థితి మరోసారి వెలుగులోకి వచ్చింది. చిన్నపాటి వర్షానికే బస్‌స్టాండ్ మొత్తం బురదమయంగా మారడంతో బస్సుల రాకపోకలకు తీవ్ర అంతరాయం ఏర్పడుతోంది. తాజాగా తొర్రూరు డిపోకు చెందిన ఆర్టీసీ సూపర్ లగ్జరీ బస్సు బురదలో కూరుకుపోవడంతో ప్రయాణికులు తీవ్ర ఇబ్బందులు ఎదుర్కొన్నారు.

బస్సు టైర్లు పూర్తిగా బురదలో ఇరుక్కుపోవడంతో సిబ్బంది ఎంత ప్రయత్నించినా బయటకు తీయలేకపోయారు. చివరకు జేసీబీ సాయంతో బస్సును బయటకు తీశారు. ఈ ఘటనతో కొంతసేపు అక్కడ బస్సుల రాకపోకలకు అంతరాయం ఏర్పడింది. ప్రయాణికులు కూడా బురదలో నడుచుకుంటూ బస్సులు ఎక్కాల్సిన పరిస్థితి నెలకొంది.

తాత్కాలిక బస్‌స్టాండ్‌లో సరైన మౌలిక వసతులు లేకపోవడంతో వర్షం కురిసిన ప్రతిసారీ ఇదే పరిస్థితి ఎదురవుతోందని ప్రయాణికులు వాపోతున్నారు. బస్సులే బురదలో కూరుకుపోతుంటే తమ పరిస్థితి ఎలా ఉంటుందో అధికారులు ఆలోచించాలని కోరుతున్నారు. వర్షాకాలాన్ని దృష్టిలో పెట్టుకుని తాత్కాలిక బస్‌స్టాండ్‌లో తక్షణమే మురుగు నీటి పారుదల, రోడ్డు బలోపేతం వంటి చర్యలు చేపట్టి ప్రయాణికులకు ఇబ్బందులు లేకుండా చూడాలని ప్రజలు, ప్రయాణికులు సంబంధిత అధికారులను కోరుతున్నారు.

విశ్వభర మేడిపల్లి జులై 8
మేడ్చల్ జిల్లా  పీర్జాదిగూడ నగర పాలక సంస్థ పరిధిలోని సర్వే నంబర్ 1లో ఉన్న భారీ నిర్మాణాలను అధికారులు కూల్చివేస్తున్నారు  కూల్చివేతను బీఆర్ఎస్ కార్పొరేటర్లు పోచయ్య, హరిశంకర్ రెడ్డి అడ్డుకోవడంతో అరెస్ట్ చేసి పోలీస్ స్టేషన్కు తరలించారు. కూల్చివేత కుట్రలో భాగమేనని  నిర్మాణాలకు హెచ్ఎండీఏ, పీర్జాదిగూడ మున్సిపల్ నుంచి అన్ని అనుమతులు ఉన్నాయని పీర్జాదిగూడ మేయర్ జక్క వెంకట్ రెడ్డి ఆగ్రహం వ్యక్తం చేశారు.