ప్రియుడితో అక్రమ సంబంధానికి అడ్డుగా ఉన్నాడని సుపారీ ఇచ్చి మరీ భర్తను హత్య చేయించింది ఓ భార్య. ఈ దారుణ ఘటన ఆదిలాబాద్ జిల్లాలో చోటుచేసుకుంది. ఈ ఘటన రెండురోజుల క్రితం జరగ్గా తాజాగా వెలుగులోకి వచ్చింది.

ఆదిలాబాద్‌కు చెందిన టీచర్‌ జాదవ్‌ గజానంద్‌ జైనథ్‌, రెండు రోజుల క్రితం హత్యకు గురయ్యాడు. అయితే, భార్య ఫిర్యాదుతో కేసు నమోదు చేసుకున్న పోలీసులు విచారణ చేపట్టగా.. అసలు నేరస్తులు ఎవరనేది బయటపెట్టారు. మృతుడు జైనథ్ భార్య మహేష్‌ అనే వ్యక్తితో ప్రేమలో ఉన్నట్లు పోలీసుల విచారణలో తేలింది. ఆమె ప్రియుడితో సంతోషంగా ఉండాలంటే.. తన భర్త అడ్డు తొలగించుకోవాలని ప్లాన్ చేసింది. 

ఈ క్రమంలో భర్త మృతిచెందినా.. తన మీద ఎవరికీ అనుమానం రాకుండా ఉండాలని, ఒక సుపారీ గ్యాంగ్‌తో ఫోన్‌లో మాట్లాడి డీల్ కుదుర్చుకుని వారితో హత్య చేయించింది. అయితే, భర్త హత్య జరిగిన రెండురోజుల తర్వాత భార్య పోలీస్ స్టేషన్‌కు వెళ్లి తన భర్త రెండురోజుల నుంచి ఇంటికి రాలేదని, ఎక్కడికి వెళ్ళాడో తెలియడం లేదని కంప్లైంట్ చేసింది. దీంతో పోలీసులు విచారణ జరపగా అసలు విషయం బయటపడింది. కాగా, పోలీసులు ఆ మహిళతో పాటు హత్య చేసిన వారిని అదుపులోకి తీసుకున్నారు.

భర్త కొట్టాడనో, తిట్టాడనో పుట్టింటికి వెళ్లే భార్యలను చూసి ఉంటాం. కానీ ఓ మహిళ భర్త కోసం ఏకంగా ప్రతీకార దాడికి దిగింది. ఈ ఘటన హైదరాబాద్‌లో జరిగింది. భర్త మందు అడిగితే కొట్టారనే ఆగ్రహంతో ఊగిపోయిన భార్య వైన్‌ షాప్‌ సిబ్బందిపై దాడికి చేసింది. అడ్డొచ్చిన పోలీసులనూ వదల్లేదు. ఈ ఘటనకు సంబంధించి వివరాలు ఇలా ఉన్నాయి. హైదరాబాద్‌లోని మధురానగర్ పోలీస్‌స్టేషన్ పరిధిలో ఓ కుటుంబం నివాసముంటోంది. 

మద్యం కొనేందుకు అక్కడే వైన్‌ షాప్‌ వద్దకు వెళ్లి ఓ వ్యక్తి మద్యం ఇవ్వాలని అడిగాడు. దీంతో అక్కడ ఏం జరిగిందో ఏమో తెలియదు గానీ.. మద్యం అడిగిన వ్యక్తిపై వైన్‌ షాప్‌ సిబ్బంది దాడి చేశారు. ఆవ్యక్తి తల పగల గొట్టి తీవ్రంగా గాయపరిచారు. దీంతో భర్తను రక్తంతో చూసిన భార్యకు ఏం జరిగిందో తెలుసుకుని ఆగ్రహంతో ఊగిపోయింది. ఇంకేముంది వైన్‌ షాప్‌ వద్దకు చేరుకుని అక్కడి సిబ్బందిపై దాడికి దిగింది. స్థానికులు అడ్డుకున్నా ఎవరిమాటా లెక్కచేయకుండా వైన్ షాపులోకి జొరబడి సిబ్బందిపై దాడికి దిగింది. 

విషయం తెలుసుకున్న పోలీసులు వెంటనే అక్కడికి చేరుకుని ఆమెను అడ్డుకునే ప్రయత్నం చేశారు. ఆగ్రహంతో ఊగిపోయిన మహిళ పోలీసులనీ చూడకుండా వారి జుట్టుపట్టుకుని కొట్టింది. దాడి చేసిన వారిని వదిలేసి తనను, తన భర్తను అడ్డుకుంటారా? అని ప్రశ్నించింది. దీంతో దాడి చేసిన మహిళపై వేర్వేరుగా మూడు కేసులు నమోదు చేశారు. ఈ ఘటనకు సంబంధించి పూర్తి వివరాలు తెలియాల్సివుంది. పోలీసులు కేసు నమోదు చేసుకుని దర్యాప్తు చేస్తున్నారు.