టెట్ ఫలితాల్లో అర్హత సాధించలేకపోయిన వారికి మంత్రి నారా లోకేష్ గుడ్ న్యూస్ తెలిపారు. వారి కోసం మరోసారి టెట్ నిర్వహిస్తామన్నారు. కొత్తగా డీఎడ్, బీఎడ్ పూర్తైన వారికి కూడా టెట్ లో అవకాశం కల్పిస్తామన్నారు. ఆ తర్వాతనే మెగా డీఎస్సీ నిర్వహిస్తామని ఆయన స్పష్టం చేశారు. 

మొన్న వెల్లడైన టెట్ ఫలితాల్లో 58.4 శాతం మంది అర్హత సాధించినట్టు ఆయన వివరించారు. తమ కూటమి ప్రభుత్వం నిరుద్యోగ యువతకు మేలు చేసేందుకు ముందు ఉంటుందని ఆయన వెల్లడించారు. అన్ని రకాలుగా నిరుద్యోగులకు అండగా ఉంటుందని ఆయన స్పష్టం చేశారు. కూటమి ప్రభుత్వం హామీ ఇచ్చిన మేరకు మెగా డీఎస్సీ నిర్వహించి విద్యార్థుల జీవితాల్లో వెలుగులు నింపుతామన్నారు. గత ప్రభుత్వం ఉద్యోగాలు ఇవ్వకుండా వేధించిందని.. కానీ తమ ప్రభుత్వం మాత్రం ఉద్యోగాలకు పెద్ద పీట వేస్తుందన్నారు.

ఆంధ్రప్రదేశ్ మాజీ ముఖ్యమంత్రి జగన్‌పై మంత్రి నారా లోకేశ్ సంచలన వ్యాఖ్యలు చేశారు. వైసీపీ కార్యాలయాల నిర్మాణాలపై తీవ్రస్థాయిలో ధ్వజమెత్తారు. వివిధ జిల్లాల్లోని వైసీపీ కార్యాలయ భవనాల ఫొటోలను ట్వీట్ చూస్తూ నిప్పులు చెరిగారు. ‘‘జగన్ ఆంధ్రప్రదేశ్ రాష్ట్రం నీ తాత రాజారెడ్డి జాగీరా! వైసీపీ కోసం 26 జిల్లాల్లో 42 ఎకరాలకు పైగా వెయ్యి రూపాయల నామ మాత్రపు లీజుకి 33 ఏళ్లకు కేటాయించుకున్నావు.’’ అని పేర్కొన్నారు.

అదేవిధంగా ‘‘జనం నుంచి దోచుకున్న రూ.500 కోట్లతో ప్యాలెస్‌లు కడుతున్నావ్. నీ ఒక్కడి భూదాహానికి కబ్జా అయిన రూ.600 కోట్లకు పైగా విలువైన 42 ఎకరాల్లో 4200 మంది పేదలకు సెంటు స్థలాలు ఇవ్వొచ్చు. నీ విలాసాల ప్యాలెస్‌ల నిర్మాణానికి అయ్యే 500 కోట్లతో 25వేల మంది పేదలకు ఇళ్లు కట్టి ఇవ్వవచ్చు. ఏంటి ఈ ప్యాలెస్‌ల పిచ్చి? నీ ధనదాహానికి అంతులేదా?’’ అంటూ మండిపడ్డారు.

అదేవిధంగా అనుమతులు లేకుండా నిర్మించిన ఈ వైసీపీ కార్యాలయాలను కూల్చొద్దని మంత్రి లోకేశ్‌కు నెటిజన్లు రిక్వెస్ట్ చేస్తున్నారు. అంత భారీ నిర్మాణాలను నేలమట్టం చేసేందుకు బదులుగా ప్రభుత్వ స్కూళ్లకు, ఆసుపత్రులకు ఇచ్చే అవకాశముంటే ఇవ్వాలని కోరుతున్నారు. దీని ద్వారా ప్రభుత్వానికి, ప్రజలకు సంయుక్తంగా మేలు జరుగుతుందని సూచిస్తున్నారు. మరి దీనిపై కూటమి ప్రభుత్వం ఎలాంటి నిర్ణయం తీసుకుంటుందో వేచిచూడాల్సిందే.