Andhra Pradesh BJP: ఆంధ్రప్రదేశ్‌లో బీజేపీ విస్తృతస్థాయి సమావేశం నేడు విశాఖపట్నంలోని కన్వెన్షన్ సెంటర్‌లో జరగనుంది. బీజేపీ జాతీయ అధ్యక్షుడు నితిన్ నబిన్ అధ్యక్షతన ఈ సమావేశం నిర్వహించనున్నారు. రాష్ట్రంలో పార్టీ బలోపేతం, ప్రస్తుత రాజకీయ పరిస్థితులు, ప్రజలకు సంబంధించిన పలు అంశాలపై సమావేశంలో చర్చించే అవకాశం ఉంది. రాష్ట్రంలోని ముఖ్య నేతలు, పార్టీ కార్యవర్గ సభ్యులు, ముఖ్య నాయకులు ఈ సమావేశానికి హాజరుకానున్నారు.

ఈ సమావేశంలో బీజేపీ రాష్ట్ర కార్యవర్గ సమావేశాన్ని నిర్వహించి రెండు కీలక తీర్మానాలపై చర్చించనున్నారు. రాష్ట్రంలో పార్టీ భవిష్యత్ కార్యాచరణ, ప్రజా సమస్యలపై అనుసరించాల్సిన విధానం వంటి అంశాలపై నేతలు చర్చించే అవకాశం ఉంది. అలాగే కేంద్ర ప్రభుత్వ పథకాలను ప్రజల్లోకి మరింత విస్తృతంగా తీసుకెళ్లడం, రాష్ట్రంలో పార్టీకి మరింత బలం చేకూర్చేలా కార్యక్రమాలను రూపొందించడం వంటి అంశాలు కూడా సమావేశంలో ప్రస్తావనకు వచ్చే అవకాశం ఉంది.

ముఖ్యంగా ఆంధ్రప్రదేశ్‌లో సాగు, తాగునీటి ప్రాజెక్టులపై సమావేశంలో ప్రత్యేకంగా చర్చించనున్నారు. రాష్ట్రంలో నీటి వనరుల అభివృద్ధి, సాగునీటి ప్రాజెక్టుల పురోగతి, ప్రజలకు తాగునీటి సౌకర్యాల కల్పన వంటి అంశాలపై పార్టీ నేతలు తమ అభిప్రాయాలను వెల్లడించనున్నారు. రాష్ట్రానికి సంబంధించిన కీలక అంశాలపై చర్చ జరగనున్న నేపథ్యంలో వైజాగ్‌లో జరిగే బీజేపీ విస్తృతస్థాయి సమావేశానికి ప్రాధాన్యత ఏర్పడింది.

తెలంగాణ ముఖ్యమంత్రి రేవంత్ రెడ్డిని బీజేపీ ఎమ్మెల్యేలు సచివాలయంలో కలిశారు. ముఖ్యమంత్రిని కలిసిన వారిలో బీజేపీ శాసన సభా పక్ష నేత ఏలేటి మహేశ్వర్ రెడ్డి, ఎమ్మెల్యేలు రామారావు పటేల్, పైడి రాకేశ్ రెడ్డిలు ఉన్నారు. రైతు సమస్యలు, ధాన్యం కొనుగోళ్లపై చర్యలు తీసుకోవాలని వారు ముఖ్యమంత్రిని కోరారు. 

అదేవిధంగా ముఖ్యమంత్రి రేవంత్ రెడ్డి సాగునీటి శాఖపై సమీక్ష నిర్వహించారు. సమీక్షలో మంత్రులు తుమ్మల నాగేశ్వర రావు, కొండా సురేఖ, ఉత్తమ్ కుమార్ రెడ్డి పాల్గొన్నారు. కాళేశ్వరం ప్రాజెక్టు, డ్యామ్ సేఫ్టీ అథారిటీ నివేదికపై వారు చర్చించారు.