కేజ్రీవాల్ కు మరోసారి షాక్ తగిలింది. ఎన్నో ప్రయత్నాల తర్వాత నిన్న గురువారం రాత్రి బెయిల్ వచ్చిందని సంతోషించే లోపే.. బెయిల్ మీద స్టే విధించింది హైకోర్టు. గురువారం రాత్రి ఢిల్లీలోని రౌస్ అవెన్యూ కోర్టు కేజ్రీవాల్ కు బెయిల్ ఇవ్వడంతో దాన్ని సవాల్ చేస్తూ ఈడీ హైకోర్టులో పిటిషన్ వేసింది. దానిపై హైకోర్టు విచారణ జరిపింది. 

బెయిల్ మీద స్టే విధించింది. హైకోర్టులో జస్టిస్ సుధీర్ కుమార్ జైన్, జస్టిస్ రవీందర్ దుడేజాతో కూడిన ధర్మాసనం ఈ స్టే విధించింది. కాగా ఈ బెంచ్ కంటే ముందు ఈడీ బెయిల్ మీద మీద స్టే విధించాలంటూ వేసిన పిటిషన్ ను తోసిపుచ్చింది. కానీ తర్వాత బెంచ్ మాత్రం దానిపై స్టే విధించింది. 

పూర్తి స్థాయిలో కేసును విచారించేందుకు అనుకూలమైన సమయాన్ని తమకు ఇవ్వలేదని.. తమ వాదన వినిపించేందుకు సమయం ఇవ్వలేదని హైకోర్టులో ఈడీ తరఫున అడిషనల్ సొలిసిటర్ జనరల్ వాదించారు. మనీలాండరింగ్ యాక్ట్‌లోని సెక్షన్ 45ని ప్రస్తావించిన అడిషనల్ సొలిసిటర్ జనరల్ బెయిల్‌పై స్టే విధించాలని కోరారు. ప్రస్తుతం దానిపై ఇంకా విచారణ జరిగే అవకాశం ఉంది.

ఢిల్లీ లిక్కర్ స్కాం కేసులో సీఎం కేజ్రీవాల్ దాఖలు చేసిన పిటిషన్‌పై రౌస్ అవెన్యూ కోర్టు ఇవాళ(గురువారం) విచారించింది. ఈడీ, కేజ్రీవాల్ లాయర్ల తరఫున వాదనలు విన్న కోర్టు తీర్పును రిజర్వ్ చేసింది. ఢిల్లీ సీఎం బెయిల్ దరఖాస్తును వ్యతిరేకిస్తూ, అదనపు సొలిసిటర్ జనరల్ (ఏఎస్‌జీ)ఎస్వీ రాజు, గోవా అసెంబ్లీ ఎన్నికల సమయంలో ఆమ్ ఆద్మీ పార్టీ కన్వీనర్ గోవాలోని హోటల్ బస కోసం నేరాల ద్వారా వచ్చిన ఆదాయంలో కొంత భాగాన్ని రుజువు చేయడానికి ఈడీ వద్ద డాక్యుమెంటరీ ఆధారాలు ఉన్నాయని వాదించారు.

అదేవిధంగా గోవా అసెంబ్లీ ఎన్నికల సమయంలో ఆమ్ ఆద్మీ పార్టీ ప్రచారానికి నిధులు సమకూర్చినట్లు ఆరోపణలు ఎదుర్కొంటున్న సహ నిందితుడు చన్‌ప్రీత్ సింగ్‌కు ఫోన్ కాల్స్, కాల్ డేటా రికార్డుల (సీడీఆర్) రూపంలో ఫెడరల్ ఏజెన్సీ వద్ద డాక్యుమెంటరీ ఆధారాలు సైతం ఉన్నాయని ఆయన తెలిపారు. వివిధ వ్యక్తుల నుంచి రూ.45కోట్లు నగదు రూపంలో అరవింద్ కేజ్రీవాల్ గోవాలోని హోటల్ బసకు ఆయన ఖాతా నుంచి చెల్లించారని తెలిపారు. ఈ వ్యక్తుల నుంచి రికవరీ చేయబడిన టోకెన్ నంబర్లు అరవింద్ కేజ్రీవాల్‌తో ప్రత్యక్ష సంబంధం కలిగి ఉన్నాయని లా ఆఫీసర్ పేర్కొన్నారు.