మెట్రో రైలు ప్రయాణ వేళల్లో మార్పులు చేశారంటూ జరుగుతోన్న ప్రచారాన్ని హైదరాబాద్ మెట్రో రైలు అధికారులు ఖండించారు. మెట్రో ప్రయాణ వేళల్లో ఎలాంటి మార్పు చేయలేదన్నారు. ఎప్పటిలాగే ఉదయం 6గంటల నుంచి రాత్రి 11 గంటల వరకు మెట్రో రైళ్లు నడుస్తాయని అధికారులు స్పష్టం చేశారు.

అయితే, ప్రతి శుక్రవారం రాత్రి 11.45 గంటల వరకు, ప్రతి సోమవారం ఉదయం 5.30 గంటల నుంచే రైళ్ల రాకపోకలపై పరిశీలన మాత్రమే జరిగిందన్నారు. అయితే, ఇంకా ఆ వేళలపై ఎలాంటి తుది నిర్ణయం తీసుకోలేదని తెలిపారు. 

కాగా, ప్రయాణికుల రద్దీ, రైళ్లు, ట్రాక్ నిర్వహణ సాధ్యాసాధ్యాలను పరిశీలిస్తున్నట్లు అధికారులు వెల్లడించారు. ప్రయాణికులెవరూ మెట్రో రైళ్ల సమయం విషయంలో అయోమయానికి గురికావొద్దని చెప్పారు. యథావిధిగా నిర్దిష్ట సమయానికే మెట్రో రాకపోకలు ఉంటాయని ప్రకటించారు.