విశ్వంభర, హైదరాబాద్ : ఈనెల 29వ తేదీతో తెలంగాణలో 5 ఎమ్మెల్సీ స్థానాలు ఖాళీ కానున్నాయి. అయితే ఈ ఎమ్మెల్సీ ఖాళీలను భర్తీ చేసేందుకు ఇప్పటికే ఎన్నికల సంఘం నోటిఫికేషన్ కూడా జారీ చేసింది. ఈ ఎమ్మెల్సీలుగా పోటీ చేసేవారు నామినేషన్‌లు దాఖలు చేసుకోవడానికి ఈనెల 10వ తేదీ వరకు గడువు విధించింది. ఇక ఖాళీ కానున్న 5 ఎమ్మెల్సీ స్థానాల్లో ఒకటి బీఆర్ఎస్‌కు, మిగిలిన 4 ఖాళీలు కాంగ్రెస్ పార్టీకి దక్కనున్నాయి. నామినేషన్‌ గడువు సమీపిస్తుండటంతో అభ్యర్థుల ఎంపికపై అధికార కాంగ్రెస్‌ దృష్టి సారించింది. ఆశావహుల జాబితాను పరిశీలించడంతోపాటు సామాజిక సమీకరణాలను పరిగణనలోకి తీసుకొని అభ్యర్థుల ఎంపికకు కసరత్తు చేస్తోంది. పోటీ తీవ్రస్థాయిలో ఉండటంతో అభ్యర్థుల ఖరారు పార్టీకి సవాల్‌గా మారింది. ఇక ఎమ్మెల్యే కోటా ఎమ్మెల్సీ సీటు పొందేందుకు నేతలందరూ రాష్ట్ర స్థాయి నుంచి ఢిల్లీ స్థాయి వరకు లాబీయింగ్‌లు చేస్తున్నారు. గతంలో పట్టభద్రుల నియోజకవర్గం నుంచి గెలిచి ప్రస్తుత ఎన్నికల్లో పోటీ చేయని జీవన్‌రెడ్డి తనకు ఎమ్మెల్యేల కోటాలో అవకాశం ఇవ్వాలని కోరుతున్నారు. ఇక మాజీ ఎంపీ మధుయాస్కీగౌడ్‌ కూడా ఎమ్మెల్సీ పదవికోసం డిల్లి  కేంద్రంగా  తీవ్ర ప్రయత్నాలు చేస్తున్నట్లు సమాచారం. అలాగే టిపిసిసి వర్కింగ్ ప్రెసిడెంట్ జగ్గారెడ్డి కూడా డిల్లి కీ చేరుకొని తన వంతు ప్రయత్నాలు చేస్తున్నారు . ఇకవీరితో పాటు సిఎం సలహాదారు వేం నరేందర్‌రెడ్డి, టీపీసీసీ జనరల్‌ సెక్రటరీ అద్దంకి దయాకర్‌, సంపత్  ఈరవత్రి అనిల్, సామ రామ్మోహన్ రెడ్డి, మాజీ ఎంపి విజయశాంతి , జట్టి కుసుమ కుమార్, కుమార్ రావు, బండి సుధాకర్ గౌడ్, చరణ్ కౌశిక్, సునీతా రావు, సరితా యాదవ్ పేర్లు ప్రముఖంగా వినిపిస్తున్నాయి. వీరంతా పార్టీ అధిష్టానాన్ని ప్రసన్నం చేసుకునేందుకు విశ్వ ప్రయత్నాలు చేస్తున్నారు. ఇక  అభ్యర్థుల  ఖరారు విషయం లో ఈరోజు సిఎం రేవంత్ రెడ్డి , డిప్యూటి సిఎం బట్టి , మంత్రి ఉత్తంకుమార్ రెడ్డి డిల్లి వెళ్లనున్నారు . అధిష్టానం పెద్దలతో చర్చలు అనంతరం రేపు లేదా ఎల్లుండి అభ్యర్థుల ఫైనల్ లిస్టు విడుదల చేసే అవకాశం ఉన్నట్టు తెలుస్తుంది . 

కాంగ్రెస్ పార్టీ సీనియర్ నేత, ఎమ్మెల్సీ జీవన్‌రెడ్డి సంచలన వ్యాఖ్యలు చేశారు. దివంగత మాజీ ప్రధాని రాజీవ్ గాంధీ బతికి ఉంటే ఎప్పుడో అయోధ్యలో రామమందిరం పూర్తి అయ్యేదని అన్నారు. కోర్టు తీర్పు ప్రకారమే రామ మందిరాన్ని నిర్మించామని వెల్లడించారు. న్యాయ స్థానం తీర్పును ఎవరైనా గౌరవించాలన్నారు. కాంగ్రెస్ పార్టీ మతసామరస్యానికి కట్టుబడి ఉందని వ్యాఖ్యానించారు. 

బీజేపీ తీరుతోనే రామమందిరం ఆలస్యమైందని ఆరోపించారు. మోడీ మత విద్వేషాలు రెచ్చగొడుతున్నారని దుయ్యబట్టారు. బుల్డోజర్ కల్చర్ తెచ్చింది బీజేపీ ప్రభుత్వం అని విరుచుకపడ్డారు.  జగిత్యాల ప్రజల తీర్పును గౌరవిస్తానని జీవన్ రెడ్డి స్పష్టం చేశారు. లోక్ సభ ఎన్నికల్లో కేంద్రంలో కాంగ్రెస్ ప్రభుత్వం ఏర్పడుతుందని జోస్యం చెప్పారు. కాంగ్రెస్ ఆధ్వర్యంలో ఏర్పడిన ఇండియా కూటమి విజయం సాధిస్తుందని ధీమా వ్యక్తం చేశారు.

ఆర్టీసీ బస్ లో మహిళలకు ఉచిత ప్రయాణాన్ని మోడీ తప్పు పడుతున్నారని గుర్తుచేశారు. దీన్నిబట్టి మహిళల పట్ల మోడీకి ఉన్న వివక్షత అర్ధమౌతుందన్నారు. మోడీ ముస్లిం రిజర్వేషన్ల విషయంలో ద్వంద వైఖరిని అవలంబిస్తున్నారని విమర్శించారు.. దేశంలో బుల్ డోజర్ కల్చర్‌ను తెచ్చింది బీజేపీ పార్టీ అని అన్నారు. రామ మందిరం అంకురార్పణ 1989లో రాజీవ్ గాంధీ ప్రధానిగా ఉన్నప్పుడు జరిగిందన్నారు. ఈ విషయాన్ని ప్రజల్లోకి తీసుకెళ్లడంలో కాంగ్రెస్ విఫలమైందన్నారు. వాస్తవాలను కప్పి పుచ్చడానికి మోడీ ప్రయత్నం చేస్తున్నాడని  జీవన్ రెడ్డి మండిపడ్డారు.