రైతు రుణమాఫీపై ప్రభుత్వం తీవ్ర కసరత్తు చేస్తోంది. రుణమాఫీ చెల్లింపును జులై 15 నుంచి ఆగస్టు 15 వరకూ దశల వారీగా ఇవ్వాలని నిర్ణయించినట్లు తెలుస్తోంది. ఆగస్టు 15లోగా రూ. 2లక్షల రైతు రుణమాఫీకి ప్రభుత్వం పలు మార్గాలు అన్వేషిస్తోంది. 

జులై 15 నుంచి రూ. 50వేల లోపు, ఆ తర్వాత రూ. 75వేలు,  రూ. లక్ష.. ఇలా పెంచుతూ బ్యాంకులకు జమ చేసే విధానాన్ని పరిశీలిస్తోంది. రైతుల్లో 70 శాతం మందికి రూ. లక్ష లోపు రుణం ఉన్నట్లు ప్రభుత్వం అంచనా వేసింది. తొలి దశలో వీరికి మాఫీ చేసి మిగిలినవారికి ఆగస్టు 15లోగా జమ చేయాలనే అంశంపైనా చర్చ సాగుతోంది. అయితే, నిధుల లభ్యతపై స్పష్టత వచ్చాక అర్హుల గుర్తింపు ప్రక్రియ మొదలవనున్నట్లు సమాచారం.

తెలంగాణ రాష్ట్ర ప్రభుత్వం ఇచ్చిన హామీ మేరకు రూ.2లక్షల రుణమాఫీపై కసరత్తు చేస్తోంది. ఇప్పటికే విధి విధానాలపై అధికారులు అన్ని పనులు పూర్తి చేసినట్టు తెలుస్తోంది. డిసెంబర్ 9నే చేస్తామన్న రుణమాఫీ కాస్తా ఆగస్టు 15 కు మారింది. ఇక ఇచ్చిన హామీ సమయం గడువు దగ్గర పడుతుండటంతో సీఎం రేవంత్ రెడ్డి రుణమాఫీ మీద దృష్టి సారించారు.

ఈ మేరకు ఇప్పటికే సంబంధిత అధికారులకు ఆదేశాలు జారీ చేశారు. రైతుల అకౌంట్లకే డబ్బులు వేయాలని ఆలోచిస్తున్నట్టు తెలుస్తోంది. ఇందుకోసం ఇప్పటికే కసరత్తులు స్టార్ట్ చేశారు. ఈ నెల 15 లేదా 18న రుణమాఫీ అంశం మీద కేబినెట్ భేటీ నిర్వహించబోతున్నట్టు తెలుస్తోంది. 

ఏ తేదీని కటాఫ్ గా పరిగణించాలి, శాఖల సమన్వయంతో పాటు రుణమాఫీ అర్హులను ఎలా గుర్తించాలి, నిధుల సమీకరణపై రేవంత్ రెడ్డి సమీక్షించబోతున్నారు. డిసెంబర్ నెలలోని ఏదో ఒక తేదీని కటాఫ్ గా పరిగణించబోతున్నట్టు తెలుస్తోంది. ఇప్పటికే కొన్ని రాష్ట్రాల్లో ఎలా రుణమాఫీ చేశారనే దానిపై అధికారులు అధ్యయనాలు చేస్తున్నారు. మహారాష్ట్రలో నేరుగా రైతుల అకౌంట్లలోకి ఎలా డబ్బులు జమ చేశారనే దానిపై కసరత్తులు మొదలు పెట్టారు.