Bihar News: ప్రాణాలు కాపాడాల్సిన వైద్యులే యమధర్మరాజుల్లా మారితే.. పేషెంట్ల పరిస్థితి ఏంటి? తెల్ల కోటు వెనుక ఉన్న కొందరు వైద్యుల దారుణ నిర్లక్ష్యానికి, అజ్ఞానానికి ఒక నిరుపేద యువతి జీవితం శాశ్వతంగా అంధకారంలోకి వెళ్ళింది. చిన్న చెవి నొప్పి అని ఆస్పత్రికి వెళితే.. మోచేతి పైవరకు చేయి తీసేసే తీసుకొచ్చారు పాట్నాలోని మహావీర్ ఆరోగ్య సంస్థాన్ వైద్యులు. అస‌లు ఏం జ‌రిగింది ఇప్పుడు చూద్దాం.

ఇంజెక్షన్ కాదు.. ఒక జీవితాన్ని నాశనం 

బిహార్‌లోని శివహర్ జిల్లాకు చెందిన 20 ఏళ్ల రేఖ చెవి నొప్పితో బాధపడుతూ మహావీర్ ఆరోగ్య సంస్థాన్ ఆస్పత్రికి వెళ్లింది. ఆమెకు చిన్న శస్త్రచికిత్స పేరిట తప్పుడు ఇంజెక్షన్ ఇచ్చారని బాధితురాలు ఆరోపిస్తోంది. ఆ ఇంజెక్షన్ వికటించి క్షణాల్లో చేయి రంగు మారిపోయి, నరకాన్ని తలపించే నొప్పి మొదలైంది. "చేయి నల్లబడుతోంది, విపరీతమైన నొప్పి వస్తోంది" అని మొత్తుకున్నా సరే, అక్కడి డాక్టర్లు ఏమాత్రం పట్టించుకోకుండా నిర్లక్ష్యంగా వ్యవహరించారు.

చేయి తీసేస్తేనే ప్రాణం దక్కుతుందన్నారు

పరిస్థితి చేతులు దాటిపోవడంతో, రేఖ కుటుంబ సభ్యులు ఆమెను దిక్కుతోచని స్థితిలో మెదాంతా ఆస్పత్రికి తరలించారు. అక్కడి వైద్యులు పరీక్షించి "తప్పుడు ఇంజెక్షన్ కారణంగా ఇన్ఫెక్షన్ చేయి మొత్తం వ్యాపించింది.. ప్రాణాలు కాపాడాలంటే మోచేతి పైనుంచి చేయిని తీసివేయడం ఒక్కటే మార్గం" అని తెల్చి చెప్పారు. దాంతో వేరే దారి లేక ఆ యువతి ఒక చేయిని కోల్పోవాల్సి వచ్చింది.

వైద్యుల పాపం.. రద్దయిన పెళ్లి

ఒక చిన్న చికిత్స కోసం వెళ్లిన యువతి, డాక్టర్ల నిర్లక్ష్యం వల్ల జీవితాంతం వికలాంగురాలిగా మారిపోయింది. ఈ దారుణ ఘటనతో ఆమె పడాల్సిన అవస్థలు అన్నీ ఇన్నీ కావు. త్వరలోనే జరగాల్సిన ఆమె వివాహం కూడా ఈ ఘటనతో రద్దయిపోయింది. ఒక వైపు చేయి పోయి, మరోవైపు జీవితం నాశనమై ఆ యువతి, ఆమె కుటుంబం కన్నీరు మున్నీరవుతున్నారు.

పోలీసుల వ‌ద్ద కూడా జ‌ర‌గ‌ని న్యాయం

ఇంత జరుగుతున్నా, బాధ్యులైన వైద్యులపై చర్యలు తీసుకోవాలని పోలీసులకు ఫిర్యాదు చేస్తే కేసు నమోదు చేయడానికి కూడా వెనుకాడటం పట్ల తీవ్ర నిరసన వ్యక్తమవుతోంది. వైద్యుల అహంతో కూడిన నిర్లక్ష్యం, ప్రభుత్వ వ్యవస్థల ఉదాసీనతపై సర్వత్రా ఆగ్రహం వ్యక్తమవుతోంది. తప్పు చేసిన డాక్టర్లపై కఠిన చర్యలు తీసుకుని, రేఖకు తగిన నష్టపరిహారం అందించి న్యాయం చేయాలని సోష‌ల్ మీడియా వేదిక‌గా అంద‌రూ కామెంట్లు  చేస్తున్నారు.

విశ్వంభర, వెబ్ డెస్క్ : బీహార్ రాజధాని పాట్నాలో నిరసనలతో అట్టుడికిపోతోంది. పాఠశాలకు వెళ్లిన విద్యార్థి తిరిగి ఇంటికిరాక పోగా...అనుమానాస్సదరీతిలో చనిపోయింది. అయితే చనిపోయిన విషయాన్ని స్కూల్ సిబ్బంది దాచేందుకు ప్రయత్నం చేయడంతో ఉద్రిక్తతకు దారి తీసింది. బాధిత కుటుంబానికి అండగా ఓ కులం తోడై పాట్నాలో నిరసనలకు దిగింది. రోడ్లపై మంటలు పెట్టి...సత్వర న్యాయం కోసం డిమాండ్ చేస్తోంది. 

టినీ టాట్ అకాడమీ స్కూల్ లో చదివే చిన్నారి...గురువారం స్కూల్ ట్యూషన్ అయ్యాక కూడా ఇంటికి రాలేదు. దీంతో కుటుంబ సభ్యులు ఆందోళనతో స్కూల్ కు వెళ్లి అడగగా...స్కూల్ సిబ్బంది పొంతనలేని సమాధానం ఇవ్వడంతో కుటుంబ సభ్యులకు అనుమానం వచ్చింది అర్ధరాత్రి వరకు స్కూల్ పరిసరాలను వెతికారు. 

చివరకు ఉదయం 3 గంటల ప్రాంతంలో స్కూల్ ఆవరణలోనా డైనేజీలో చిన్నారి మృతదేహం కనిపించింది. దీంతో ఆగ్రహానికి గురైన కుటుంబ సభ్యులు స్కూల్ కు నిప్పంటించారు. విషయం తెలుసుకున్న పోలీసులు వెంటనే స్కూల్ కు చేరుకున్న ఉద్రిక్తతలను అదుపులోకి తీసుకొచ్చారు. ఎస్పీ చంద్రప్రకాష్ స్వయంగా ఈ కేసు దర్యాప్తు చేపట్టారు.

ఎస్పీ వివరిస్తూ....స్కూల్ లోకి వెళ్లిన చిన్నారి ....తిరిగి బయటకు వెళ్లిన సీసీటీవీ ఫుటేజీల్లో నమోదు అయ్యింది. దీంతో ఈ ఆవరణలోనే చిన్నారి మృతి చెందినట్లు నిర్థారించుకున్నాం.ఈ కేసుకు సంబంధించి ముగ్గురిని అదుపులోకి తీసుకున్నామని, సిబ్బంది మృతి దేహాన్ని దాచే ప్రయత్నం ఎందుకు చేసిందో తేలాల్సి ఉందన్నారు. మరోవైపు ఉద్రిక్తతలు విస్తరించకుండా పోలీస్ బలగాలను మోహరించినట్లు తెలిపారు.