ఏపీలో ఎన్డీయే కూటమి అధికారంలోకి వచ్చినప్పటి నుంచి అమరావతినే రాజధానిగా చేస్తారని ప్రచారం జరుగుతోంది. దానికి నేడు తెర దించేశారు చంద్రబాబు నాయుడు. మంగళవారం ఆయన్ను ఎన్డీయే శాసనసభాపక్ష నేతగా ఎన్నుకున్నారు. ఈ సందర్భంగా ఆయన ఎన్డీయే ఎమ్మెల్యేలకు ధన్యవాదాలు తెలిపారు. 

ప్రజల నమ్మకాన్ని నిలబెట్టుకోవాల్సిన సమయం వచ్చిందన్నారు. ఇక రాజధాని విషయంలో కూడా స్పందించారు. ఏపీకి అమరావతే రాజధానిగా ఉంటుందని తెలిపారు. విశాఖను ఆర్థిక రాజధానిగా చేసి అభివృద్ధి చేస్తామని హామీ ఇచ్చారు. అలాగే కర్నూలు అభివృద్ధికి కూడా తాము కట్టుబడి ఉన్నామని తెలిపారు చంద్రబాబు నాయుడు. 

వైసీపీ ప్రభుత్వంలా మోసం చేయబోమని.. చెప్పిన మాటకు కట్టుబడి పనిచేస్తామన్నారు. గతంలో లాగా విధ్వంస రాజకీయాలు కాకుండా.. నిర్మాణాత్మక అభివృద్ధే లక్ష్యంగా పనిచేయాలన్నారు. సీఎం కూడా మామూలు మనిషే.. సీఎం వస్తున్నాడు అంటే ఇక పరదాలు కట్టటం, దుకాణాలు బంద్ చేయటం, ట్రాఫిక్ నిలిపి వేయటం, చెట్లు నరకటం లాంటివి ఇకపై ఉండదు అని ఆయన చెప్పుకొచ్చారు. నా కాన్వాయ్ ఒక నిమిషం ఆలస్యమైనా పర్లేదు కానీ ట్రాఫిక్ నిబంధనలు పేరుతో ప్రజల్ని ఇబ్బంది పెట్టొద్దు అని చంద్రబాబు చెప్పారు.

విశ్వంభర, విశాఖపట్నంః  ఏపీలో ఇప్పుడు ఎన్డీయే ప్రభుత్వం కొలువు దీరింది. చంద్రబాబు సీఎం అని ఇప్పటికే ప్రకటించారు. దాంతో ఇప్పుడు కూటమి ప్రభుత్వంలో ఎవరికి ఎన్ని పదవులు అనేది అందరికీ ఆసక్తిగా మారిపోయింది. ఇప్పుడు టీడీపీకి సొంతంగానే మ్యాజిక్ ఫిగర్ సీట్లు వచ్చాయి. అయినా సరే కూటమి పార్టీలను కలుపుకుని ప్రభుత్వాన్ని ఏర్పాటు చేయబోతున్నారు.

అయితే ఏపీ ప్రభుత్వంలో సీఎంతో కలిపి 26 మంది మంత్రులకు మించి ఉండొద్దు. దాంతో ఇప్పుడు టీడీపీకి చంద్రబాబుతో కలిపి 20 మంత్రి పదవులు రాబోతున్నట్టు తెలుస్తోంది. ఇక జనసేనలో ఇప్పుడు 21 మంది ఎమ్మెల్యేలు ఉన్నారు. వారు కూడా 5 మంత్రి పదవులు ఆశిస్తున్నట్టు చెబుతున్నారు. 

కాగా ఇక బీజేపీకి ఒక మంత్రి పదవి కేటాయించే అవకాశం ఉంది. దీనిపై రేపు అంటే మంగళవారం నాడు క్లారిటీ రాబోతోంది. అయితే పవన్ కల్యాన్‌ కు ఈ సారి డిప్యూటీ సీఎం పదవి వస్తున్నట్టు తెలుస్తోంది. ఇప్పటికే ఢిల్లీలో జాతీయ మీడియాతో ఆయన ఈ పదవి తీసుకోవడానికి సుముఖంగానే ఉన్నట్టు చెప్పారు.