మాజీ సీఎం వైఎస్ జగన్ మోహన్ రెడ్డి ఏపీ అసెంబ్లీ స్పీకర్ అయ్యన్న పాత్రుడికి సంచలన లేఖ రాశారు. అసెంబ్లీలో మంత్రుల తర్వాత తనతో ప్రమాణం చేయించడం పద్ధతులకు విరుద్ధం అంటూ అంసతృప్తి వ్యక్తం చేశారు. అసలు తనకు అసెంబ్లీలో ప్రతిపక్ష హోదా ఇ్వవొద్దని కూటమి ప్రభుత్వం ముందుగానే నిర్ణయించినట్టు ఉందని తెలిపారు. 

ప్రతిపక్ష హోదా ఇవ్వాలంటే పదిశాతం సీట్లు ఉండాలని చట్టంలో లేదని గుర్తు చేశారు. ఇప్పటి వరకు ఆ రూల్ ను అసెంబ్లీ, పార్లమెంట్ లు పాటించలేదన్నారు. ప్రజల తరఫున వాయిస్ బలంగా వినిపించాలంటే కచ్చితంగా ప్రతిపక్ష హోదా కావాలని కోరారు. ఇక అధికార కూటమి ఇప్పటికే తనపై శతృత్వాన్ని ప్రదర్శిస్తోందని తెలిపారు. 

చచ్చేవరకు కొట్టాలంటూ స్పీకర్ మాట్లాడిన మాటలు వీడియోల ద్వారా బయటపడ్డాయి. ఇలాంటి పరిస్థితుల్లో ప్రజా సమస్యలను ప్రతిపక్ష హోదా లేకుండా వినిపించడం చాలా కష్టం. కాబట్టి వీటన్నింటినీ దృష్టిలో ఉంచుకుని తనకు ప్రతిపక్ష హోదా ఇవ్వాలని కోరారు. అసెంబ్లీలో అధికార కూటమి తర్వాత ఎవరికి ఎక్కువ సీట్లు ఉంటే వారికే ప్రతిపక్ష హోదా ఇవ్వాలని కోరారు జగన్.  

ఏపీ మాజీ సీఎం జగన్‌కు తృటిలో ప్రమాదం తప్పింది. కడప విమానాశ్రయం నుంచి పులివెందులకు వెళ్తుండగా రామరాజు పల్లి వద్ద కాన్వాయ్‌ వాహనాలు ఢీకొన్నాయి. జగన్ కాన్వాయ్‌లోని ఇన్నోవా వాహనాన్ని ఫైర్ ఇంజన్ వాహనం ఢీకొంది. ఈ ప్రమాదంలో ఎవరికీ ఎలాంటి గాయాలు కాలేదు. దీంతో అంతా ఊపిరిపీల్చుకున్నారు.

ఇదిలా ఉండగా ఇవాళ(శనివారం) జగన్ తన సొంత నియోజకవర్గమైన పులివెందులలో పర్యటిస్తున్నారు. మూడు రోజులు అక్కడే బస చేయనున్నారు. రాయలసీమ కు చెందిన ఎమ్మెల్యే అభ్యర్థులు, ముఖ్య నేతలు, కార్యకర్తలతో జగన్ భేటీ అవుతారు. మరోవైపు ఎన్నికల్లో వైసీపీ ఎమ్మెల్యేలు 11మంది మాత్రమే గెలుపొందిన విషయం తెలిసిందే. శుక్రవారం తొలిరోజు అసెంబ్లీకి హాజరైన జగన్ బరువైన గుండెతో ఎమ్మెల్యేగా ప్రమాణ స్వీకారం చేశారు. అయితే, రెండో రోజు (ఇవాళ) నిర్వహించిన సమావేశానికి జగన్ హాజరు కాలేదు.

ఏపీలో అధికారంలోకి వచ్చిన కూటమి ప్రభుత్వం ప్రతీకార చర్యలను ప్రారంభించినట్లు తెలుస్తోంది. ఇటీవల హైదరాబాద్‌లో ఉన్న లోటస్ పాండ్‌లోని జగన్ నివాసం వద్ద ఉన్న కట్టడాలను జీహెచ్‌ఎంసీ అధికారులు తొలగించిన విషయం చర్చనీయాంశమైంది. జగన్ భద్రత పేరుతో గతంలో నిర్మించిన సెక్యూరిటీ అవుట్ పోస్టును అనుమతులు లేవని ఫిర్యాదులు అందడంతో అధికారులు కూల్చివేతలు చేపట్టారు. చంద్రబాబుకు సీఎం రేవంత్ రెడ్డి సన్నిహితుడు కావడంతో ఈ కూల్చివేత సధ్యపడిందనే ఆరోపణలు వచ్చాయి. 

ఇదిలా ఉండగా తాజాగా ఏపీ మాజీ సీఎం జగన్‌కు మరో షాక్ తగిలింది. తాడేపల్లిలో నిర్మాణ దశలో ఉన్న వైఎస్సార్సీపీ కేంద్ర కార్యాలయాన్ని అధికారులు కూల్చివేస్తున్నారు. సీఆర్‌డీఏ అధికారులు ఉదయం 5.30 గంటల నుంచి భారీ పోలీస్ బందోబస్తు మధ్య బుల్డోజర్లు, పొక్లెయినర్లతో కూల్చివేత పనులు మొదలుపెట్టారు. వైసీపీ అధికారంలో ఉన్నప్పుడు తాడేపల్లిలోని రెండు ఎకరాల్లో పార్టీ కార్యాలయ నిర్మాణాన్ని ప్రారంభించింది. అయితే, ఈ నిర్మాణం అక్రమమని సీఆర్‌డీఏ అభ్యంతరం వ్యక్తం చేసింది. దీంతో వైసీపీ హైకోర్టును ఆశ్రయించింది.

మాజీ సీఎం జగన్ కు గౌరవం ఇవ్వాలంటూ సీఎం చంద్రబాబు నాయుడు అన్నారు. మొన్న అసెంబ్లీ ఎన్నికల్లో వైసీపీ దారుణంగా ఓడిపోయిన సంగతి తెలిసిందే. దాంతో అప్పటి నుంచే జగన్ మీద సోషల్ మీడియాలో దారుణంగా ట్రోల్స్ వస్తున్నాయి. ఇక తాజాగా జగన్ కు అసెంబ్లీలో కూడా ప్రతిపక్ష హోదా దక్కలేదు. 

దాంతో సాధారణ వ్యక్తిగానే జగన్ అసెంబ్లీలో ప్రమాణ స్వీకారం చేశారు. ఇక ప్రధాన ప్రతిపక్ష నేత హోదా దక్కకపోవడంతో అసెంబ్లీ గేటు బయటనే జగన్ కారు దిగి లోపలకు నడుచుకుంటూ రావాల్సిన పరిస్థితి వచ్చింది. దాంతో ఇది గమనించిన చంద్రబాబు నాయుడు అసెంబ్లీ గేటు లోనికి జగన్ కారును రానివ్వాలంటూ అధికారులను ఆదేశించారు.

మాజీ సీఎంగా జగన్ కు గౌరవం ఇవ్వాలంటూ తెలిపారు. ఇక ప్రతిపక్షం విషయంలో ఎమ్మెల్యేలు హుందాగా వ్యవహరించాలంటూ టీడీపీ ఎమ్మెల్యేలకు సూచించారు సీఎం చంద్రబాబు నాయుడు. రాగద్వేషాలకు ఏ మాత్రం తావు ఇవ్వొద్దని.. అసెంబ్లీలో అయినా.. బయట అయినా చాలా హుందాగానే వ్యవహరించాలంటూ తెలిపారు.

జనసేన అధినేత, ఏపీ డిప్యూటీ సీఎం పవన్ కల్యాణ్‌కు ‘21’ నెంబర్ బాగా కలిసివచ్చిందని జన సైనికులు అంటున్నారు. టాలీవుడ్‌లో అగ్రహీరోగా ఉన్న పవన్ కల్యాణ్ రాజకీయాలపై మక్కువతో 2019 ఎన్నికలతో ప్రజా క్షేత్రంలోకి అడుగుపెట్టారు. భీమవరం, గాజువాక అసెంబ్లీ స్థానాల్లో పోటీ చేసిన పవన్ కల్యాణ్ ఆయా స్థానాల్లో ఘోర ఓటమిని చవి చూశారు. 

అయితే, రెండోసారి 2024 ఎన్నికల్లో ఎన్డీయే కూటమితో జత కట్టి 21 స్థానాల్లో జనసేన అభ్యర్థులతో కలిసి బరిలో నిలిచారు. ఈసారి పవన్ ఒకే ఒక్క నియోజకవర్గం (పిఠాపురం) నుంచి పోటీ చేసి భారీ మెజారిటీని కైవసం చేసుకున్నారు. తన సమీప అభ్యర్థి వైఎస్సార్సీపీ నాయకురాలు వంగ గీతపై 70,354 ఓట్ల మెజారిటీతో గెలుపొందారు. 

అంతేకాదు.. జనసేన అభ్యర్థులు 21మంది పోటీ చేసిన అన్ని స్థానాల్లో విజయాన్ని కైవసం చేసుకున్నారు. ఇవాళ(శుక్రవారం) అసెంబ్లీ సమావేశాలు ప్రారంభం కాగా సీఎం చంద్రబాబు నాయుడుతో పాటు డిప్యూటీ సీఎం పవన్ కల్యాణ్, మిగతా మంత్రులు, ఎమ్మెల్యేలు ప్రమాణ స్వీకారం చేశారు. దీంతో పవన్ కల్యాణ్ అభిమానుల ఆనందానికి అవధులు లేకుండాపోయింది. ‘21 సీట్లు తీసుకుని, 21 సీట్లు గెలిచి, 21మంది ఎమ్మెల్యేలతో 21వ తేదీన అసెంబ్లీలో అడుగుపెట్టిన ఏపీ డిప్యూటీ సీఎం పవన్ కల్యాణ్‌కు శుభాకాంక్షలు’ అంటూ పోస్టులు పెడుతున్నారు. దీంతో 21 నెంబర్ పవన్ ‌కల్యాణ్‌కు బాగా కలిసివచ్చిందని కామెంట్స్ చేస్తున్నారు.

ఏపీ అసెంబ్లీ సమావేశాలు ప్రారంభమయ్యాయి. నేడు(శుక్రవారం), రేపు సమావేశాలు కొనసాగనున్నాయి. ఈ సందర్భంగా అధికారం చేపట్టిన కూటమి ప్రభుత్వంలో సీఎం చంద్రబాబు, డిప్యూటీ సీఎం పవన్ కల్యాణ్, ఇతర మంత్రులు ప్రమాణ స్వీకారం చేస్తున్నారు. ప్రొటెం స్పీకర్ బుచ్చయ్య చౌదరి వారితో ప్రమాణం చేయిస్తున్నారు. ముఖ్యమంత్రి చంద్రబాబు, తర్వాత ఉప ముఖ్యమంత్రి పవన్ కళ్యాణ్, మంత్రి లోకేష్‌ ప్రమాణ స్వీకారం చేశారు. 

ఆ తర్వాత మిగతా మిగతా మంత్రులు, మహిళా ఎమ్మెల్యేలు అనంతరం మిగిలిన ఎమ్మెల్యేల అక్షర క్రమం ప్రకారం ప్రమాణ స్వీకారం చేయనున్నారు. అయితే తొలిసారిగా పవన్‌ కల్యాణ్‌, లోకేష్‌లు అసెంబ్లీలో అడుగుపెట్టారు. కాగా రేపు ఎమ్మెలంతా రేపు(శనివారం) స్పీకర్‌ను ఎన్నుకోనున్నారు. మాజీ సీఎం జగన్ కూడా ఈ కార్యక్రమానికి వచ్చే అవకాశాలున్నట్లు తెలుస్తోంది. ఐదేళ్ల తర్వాత సీఎం హోదాలో చంద్రబాబు అసెంబ్లీకి హాజరయ్యారు. సీఎం చంద్రబాబుకు ఎమ్మెల్యేలు స్వాగతం పలికారు. అదేవిధంగా పవన్ కల్యాణ్ తొలిసారి శాసనసభలో అడుగుపెట్టడంతో జనసైనికులు ఫుల్ జోష్‌లో ఉన్నారు.

‘ప్రభుత్వాసుల్లో పని ఉంటే పసుపు బిల్లా పెట్టుకుని వెళ్లండి.. టీ, కాఫీ ఇచ్చి మరీ పనిచేసి పెడతారు’ అని వ్యవసాయ శాఖ మంత్రి కె.అచ్చెన్నాయుడు అన్నారు. మంత్రిగా బాధ్యతలు స్వీకరించిన తొలిసారి ఆయన శ్రీకాకుళం జిల్లాకు వెళ్లారు. ఈ సందర్భంగా కార్యకర్తలకు ఆయనకు ఘన స్వాగతం పలికారు. ఈ సందర్భంగా అచ్చెన్నాయుడు మాట్లాడుతూ ఆసక్తికర వ్యాఖ్యలు చేశారు. ప్రతీ కార్యకర్త ఎస్సై దగ్గరకు వెళ్లినా, ఎమ్మార్వో దగ్గరికి వెళ్లినా, ఎండీవో దగ్గరకు వెళ్లినా, ఏ ఆఫీసుకు వెళ్లినా పసుపు బిల్ల పెట్టుకుని వెళ్ళాలన్నారు. 

అధికారులు గౌరవంగా కుర్చీ వేసి మరీ పని చేసిపెడతారని తెలిపారు. పని చేయించేలా అధికారులతో తగు సూచనలు చేస్తానని చెప్పారు. తన మాట జవదాటితే ఏమవుతారో వారికి నేను చెప్పాల్సిన అవసరం లేదంటూ మంత్రి అచ్చెన్నాయుడు స్పష్టం చేశారు. ఐదు సంవత్సరాలు పాటు కార్యకర్తలు అవమానాలు పడ్డారని, వారందరికీ తాను మాటిస్తున్నానని అచ్చెన్నాయుడు పునరుద్ఘాటించారు. తాను ఆరుసార్లు ఎమ్మెల్యేగా గెలిచానని, 2019-24 మధ్య పరిపాలన ఎలా జరిగిందో చూశామన్నారు. 

రాష్ట్రంలో తన పార్టీ తప్ప ఇంకొక ఉండకూడదన్నట్లు జగన్ వ్యవహరించారని మండిపడ్డారు. కొన్నిసార్లు పార్టీ ఉందా?లేదా? అని నిద్రలేని రాత్రులు గడిపానని గుర్తుచేసుకున్నారు. స్వాతంత్రం వచ్చిన తర్వాత 95 శాతం సీట్లు గెలిచిన చరిత్ర ఏ పార్టీకి లేదని, కూటమి ఆ స్థాయిలో విజయాన్ని సాధించిందన్నారు. ఇప్పుడు ఎవరూ ఆందోళన చెందాల్సిన పని లేదన్న అచ్చెన్నాయుడు..  తమది డబుల్ ఇంజన్ సర్కార్ అని చెప్పుకొచ్చారు. మోడీ సహకారంతో అన్ని విధాలుగా అభివృద్ధి సాధిస్తామని తెలిపారు.

ఏపీ రాజకీయాలు ఆసక్తికరంగా మారాయి. ఎన్నికల్లో ఎన్డీయే కూటమి ప్రభుత్వం ఏర్పాటు చేయడంతో టీడీపీ, జనసేన, బీజేపీ శ్రేణులు ఫుల్ జోష్‌లో ఉన్నారు. ప్రస్తుతం పరిపాలనపై దృష్టి కేంద్రీకరిస్తూనే వైసీపీని టార్గెట్ చేస్తూ విమర్శలు గుప్పిస్తున్నారు. తాజాగా మాజీ సీఎం వైఎస్ జగన్‌పై టీడీపీ నేత అయ్యన్నపాత్రుడు సంచలన వ్యాఖ్యలు చేశారు. జగన్ ఓడిపోయాడు కానీ చావలేదని.. చచ్చేవరకూ కొట్టాలని టీడీపీ నేతలతో ఆయన సంభాషించడం చర్చనీయాంశమైంది. 

దీనికి సంబంధించిన వీడియో సోషల్ మీడియాలో వైరల్ అవుతోంది. ఆ వీడియోలో ‘‘వైఎస్ జగన్‌కు అపారమైన జన, కుల బలం ఉంది. తెలంగాణ ప్రభుత్వంలో చాలా మంది అతనికి క్లోజ్‌గా ఉండే వారు..  చెప్పింది కరెక్ట్‌గా రిసీవ్ చేసుకోండి..’’ అంటూ అయ్యన్న పాత్రుడు అన్నారు. ఆయన వ్యాఖ్యలు ఇప్పుడు రాజకీయవర్గాల్లో హాట్ టాపిక్‌గా మారాయి. ఇదిలా ఉండగా నాగబాబు కూడా వైసీపీపై విమర్శలు గుప్పించారు. ‘‘వైసీపీ కోరల్లో విషం మిగిలే ఉంది.. కూటమిపై విషప్రచారం చేసేవాళ్లను వదలం.. బీ కేర్‌ఫుల్..’’ అంటూ నాగబాబు హెచ్చరించారు.

ఏపీలో బుధవారం కూటమి ప్రభుత్వం ఏర్పాటైన విషయం తెలిసిందే. సీఎంగా చంద్రబాబు, మంత్రులుగా పవన్ కల్యాణ్, నారా లోకేశ్ తదితరులు ప్రమాణ స్వీకారం చేశారు. ఈ క్రమంలో ఓ ఆసక్తికరమైన ఘటన జరిగింది. సభా కార్యక్రమంలో జనసేన అధినేత పవన్ కల్యాణ్‌ కాళ్లు పట్టుకున్నారు నారా లోకేశ్. దీనికి సంబంధించిన వీడియో ఒకటి ఇప్పుడు సోషల్ మీడియాలో వైరల్ అవుతోంది. 

పవన్ కల్యాణ్ వద్దని వారిస్తున్నా నారా లోకేశ్ వినిపించుకోలేదు. సోదరసమానులైన వ్యక్తి ఆశీర్వాదం తీసుకోవడంలో తప్పులేదంటూ ఆయన పాదాలను తాకారు. ఇది చూసిన జనసేన, టీడీపీ అభిమానులు ఈ వీడియోను షేర్ చేస్తున్నారు. అంతేకాదు ఈ వీడియోకు మంచి బ్యాక్ గ్రౌండ్ మ్యూజిక్ పెట్టి మరీ వైరల్ చేస్తున్నారు. ఈ వీడియో చూసిన తర్వాత నారా లోకేశ్‌పై మరింత అభిమానం పెరిగిందంటూ కొందరు కామెంట్లు చేస్తున్నారు. ఎంత ఎదిగినా ఒదిగి ఉండటం గొప్ప విషయమని అభినందిస్తున్నారు.

టీడీపీ-జనసేన-బీజేపీ కూటమి శాసనసభా పక్ష సమావేశం ప్రారంభమైంది. కూటమి తరఫున గెలుపొందిన ఎమ్మెల్యేలు విజయవాడలోని ఏ కన్వెన్షన్ హాల్‌లో భేటీ అయ్యారు. ఈ సందర్భంగా టీడీపీ అధినేత చంద్రబాబు నాయుడును కూటమి శాసనసభా పక్ష నేతగా ఎన్నుకున్నారు. చంద్రబాబును సీఎం అభ్యర్థిగా ప్రతిపాదించారు పవన్ కల్యాణ్. ఈ ఏకగ్రీవ తీర్మానాన్ని కూటమి నేతలు గవర్నర్‌కు పంపిస్తారు. ప్రభుత్వ ఏర్పాటుకు కూటమికి గవర్నర్ ఆహ్వానించనున్నారు. బుధవారం ఉదయం 11.27 గంటలకు సీఎంగా చంద్రబాబు ప్రమాణ స్వీకారం చేయనున్నారు. 

ఈ సందర్భంగా పవన్ కల్యాణ్ మాట్లాడుతూ.. ఐదేళ్లుగా ఆంధ్రప్రదేశ్ రాష్ట్రం విపత్కర పరిస్థితులను ఎదుర్కొందని ఆవేదన వ్యక్తం చేశారు. కష్టాల్లో ఉన్న రాష్ట్రాన్ని గాడిన పెట్టేందుకు చంద్రబాబు లాంటి అనుభవజ్ఞుడైన నాయకుడు అవసరమని అభిప్రాయపడ్డారు. అనంతరం చంద్రబాబును ఆత్మీయ ఆలింగనం చేసుకున్నారు.

మరోవైపు జనసేన శాసనసభా పక్ష నేతగా పవన్ కల్యాణ్ ఎన్నికయ్యారు. ఆ పార్టీ నేతలు పవన్ కల్యాణ్‌ను ఏక్రగీవంగా ఎన్నకున్నారు. ఇదిలా ఉండగా, బీజేపీ శాసనసభా పక్ష ఎంపికపై చర్చలు కొనసాగుతున్నాయి. ఏపీలోని విజయవాడలో బీజేపీ రాష్ట్ర కార్యాలయంలో ఆ పార్టీ ఎమ్మెల్యేలు భేటీ అయ్యారు. ఏపీ బీజేపీ రాష్ట్ర అధ్యక్షురాలు దగ్గుబాటి పురంధేశ్వరి హాజరయ్యారు. అధిష్టానం ప్రకటనకు కట్టుబడి ఉండాలని సూచించారు. శాసనసభా పక్ష సమావేశంలో పాల్గొని అభిప్రాయాలను వివరిస్తామని వెల్లడించారు.

జనసేన శాసనసభాపక్ష నేతగా పవన్‌కల్యాణ్ ఏకగ్రీవంగా ఎన్నికయ్యారు. మంగళగిరిలోని ఆ పార్టీ కార్యాలయంలో  ఎమ్మెల్యేల సమావేశం ఇవాళ(మంగళవారం) ముగిసింది. ఈ భేటీలో ఆ పార్టీ శాసనసభాపక్ష నేతగా పవన్‌కల్యాణ్‌ పేరును ఎమ్మెల్యే నాదెండ్ల మనోహర్ ప్రతిపాదించారు. ఈ సందర్భంగా పవన్‌కల్యాణ్‌ను ఎమ్మెల్యేలు ఏకగ్రీవంగా ఎన్నుకున్నారు. కాగా  విజయవాడలో జరగబోయే ఎన్డీయే కూటమి ఎమ్మె‍ల్యేల సమావేశానికి పవన్‌తో పాటు జనసేన ఎమ్మెల్యేలు హాజరు కానున్నారు.

ఇదిలా ఉండగా బీజేపీ రాష్ట్ర కార్యాలయంలో ఆ పార్టీ ఎమ్మెల్యేలు భేటీ అయ్యారు. ఎమ్మెల్యేలతో పాటు బీజేపీ రాష్ట్ర అధ్యక్షురాలు పురందేశ్వరి హాజరయ్యారు. ఈ సందర్భంగా అధిష్ఠానం ప్రకటనకు అందరూ కట్టుబడి ఉండాలని నిర్ణయించారు. కూటమిపై విశ్వాసంతో మంచి విజయాన్ని సాధించారని అభినందించారు. సీఎం ప్రమాణ స్వీకార సభకు ప్రధాని మోడీ, కేంద్ర మంత్రి అమిత్ షా రానున్నారని తెలిపారు. రాష్ట్ర బీజేపీ తరఫున సభకు హాజరవుతున్నట్లు పురందేశ్వరి వెల్లడించారు.

జనసేన అధినేత పవన్ కల్యాణ్ ఆదివారం ప్రధాని మోడీ ప్రమాణ స్వీకారోత్సవానికి సతీసమేతంగా హాజరైన సంగతి తెలిసిందే. ఇవాళ(సోమవారం) ప్రత్యేక విమానంలో మధ్యప్రదేశ్ సీఎం రమేష్‌తో కలిసి ఢిల్లీ నుంచి విశాఖ చేరుకున్నారు. అక్కడి నుంచి అనకాపల్లి గవరపాలెం నూకాంబికా అమ్మవారిని దర్శించుకున్నారు. ఎన్నికల ముందు అనకాపల్లిలో జరిగిన బహిరంగ సభలో గెలిచిన వెంటనే నూకాంబికా అమ్మవారిని దర్శించుకున్న తర్వాతే ప్రమాణ స్వీకారం చేస్తానని పవన్ కళ్యాణ్ వ్యాఖ్యానించారు. 

ఈ నేపథ్యంలో ఇవాళ అమ్మవారిని దర్శించుకుని పవన్ కల్యాణ్ ప్రత్యేక పూజలు చేశారు. అమ్మవారిని దర్శించుకున్న అనంతరం పవన్ పిఠాపురం బయలుదేరారు. పిఠాపురంలో పార్టీ నేతలతో కీలక సమావేశంలో పాల్గొన్నారు. టీడీపీ - జనసేన నేతల మధ్య నెలకొన్న అసంతృప్తుల నేపథ్యంలో పవన్ వారితో సమావేశం కానున్నట్లు సమాచారం. ఇరు పార్టీ నేతలతో జనసేనాని మాట్లాడనున్నారు. ఇదిలా ఉండగా.. పవన్ కల్యాణ్ మంత్రి పదవిని తీసుకుంటారా? ఒకవేళ తీసుకుంటే ఏ శాఖను ఎంచుకుంటారు? అనేది అత్యంత చర్చనీయాంశంగా మారింది. పవన్ కళ్యాణ్ కు డిప్యూటీ సీఎంతో పాటు మరో కీలక మంత్రి పదవి అప్పజెప్పే అవకాశాలు కనిపిస్తున్నాయని పార్టీ వర్గాల్లో జోరుగా చర్చనడుస్తోంది.