బొమ్మరిల్లు, నువ్వొస్తానంటే నెనొద్దంటానా వంటి సూపర్ హిట్ సినిమాలతో టాలీవుడ్ ప్రేక్షకుల్లో ప్రత్యేక స్థానాన్ని సంపాదించుకున్నాడు హీరో సిద్ధార్థ్. తెలుగు, తమిళ సినిమాల్లో తన నటనతో మెప్పించాడు. చాలా కాలం తర్వాత ‘చిన్నా’ అనే సినిమాతో తెలుగు ప్రేక్షకుల ముందుకు వచ్చాడు. ఆ సినిమా విడుదలైన అన్ని భాషల్లో మంచి విజయాన్ని అందుకున్న విషయం తెలిసిందే. 

సిద్ధార్థ్ ఆ తర్వాత కమల్‌హాసన్, శంకర్ కాంబినేషన్‌లో వస్తున్న మోస్ట్ అవేటింగ్ మూవీ ‘ఇండియన్ 2’ సినిమాల్లో నటిస్తున్నాడు. తాజాగా సిద్దార్థ్ తన కొత్త సినిమాను అనౌన్స్ చేశాడు. సిద్దూ తాజా చిత్రం 'మిస్ యూ'. ఈ సినిమాకు ఎన్‌.రాజశేఖర్ దర్శకత్వం వహిస్తున్నాడు. మ్యూజిక్ డైరెక్టర్ జిబ్రాన్ ఈ చిత్రానికి సంగీతం అందిస్తుండగా కన్నడ బ్యూటీ ఆషికా రంగనాథ్ కథానాయికగా నటిస్తోంది. కరుణాకరన్, బాల, సాస్తిక రాజేంద్రన్ తదితరులు ఇందులో కీలక పాత్రల్లో నటిస్తున్నారు. 

ఈ మూవీ ఫస్ట్ లుక్‌ను ఇవాళ (గురువారం)  విడుదల చేశారు. ఈ మేరకు తమిళ్ హీరో శివ కార్తికేయన్ ఎక్స్ వేదికగా మిస్ యూ ఫస్ట్ లుక్‌ను విడుదల చేశాడు. రైల్వే స్టేషన్ ప్లాట్ ఫామ్‌పై సిద్దార్థ్ నడుస్తున్న పోస్టర్‌ కొత్తగా ఉంది. చాలా రోజుల తర్వాత సిద్దార్థ్ మంచి లుక్‌లో కనిపిస్తున్నాడు. ఈ ఫస్ట్ లుక్‌ను మరో హీరో మాధవన్ కూడా రిలీజ్ చేశాడు. 7 మైల్స్ పర్ సెకండ్ ప్రొడక్షన్స్ బ్యానర్‌పై శామ్యూల్ మాథ్యూ మిస్ యూ సినిమాను నిర్మిస్తున్నారు.