ఏపీ ఎన్నికల ఫలితాల్లో ఎన్డీఏ కూటమి విజయం దిశగా దూసుకువెళుతోంది. ఇప్పటి వరకు వెలువడిన రౌండ్లలో కూటమి అభ్యర్థులు ముందంజలో ఉన్నారు.  దాదాపు కూటమి 155 స్థానాల్లో హవా సాధించడంతో టీడీపీ. జనసేన, బీజీపీ కార్యకర్తలు విజయ సంబరాలు చేసుకుంటున్నారు. ఉమ్మడి కర్నూలు జిల్లాలో 10 స్థానాల్లో టీడీపీ ముందంజలో ఉండగా.. ఒక స్థానంలో వైసీపీ ఆధిక్యంలో ఉన్నారు. అసెంబ్లీతో పాటు లోక్‌సభ ఫలితాల్లో కూడా వైసీపీ అభ్యర్థులు పూర్తిగా నిరాశ పరిచారు. వైసీపీ మంత్రులు, కీలక నేతలు ఓటమి దిశగా సాగుతున్నారు. అందులో నగరి లోక్‌సభ స్థానం నుంచి వైసీపీ బరిలో ఉన్న మంత్రి రోజా ఓటమి దిశగా వెళుతున్నారు. గాజువాక అసెంబ్లీ బరిలో మంత్రి అమర్‌నాథ్, సత్తెనపల్లిలో అంబటి రాంబాబు, ఆముదాలవలసలో స్పీకర్ తమ్మినేని, మంత్రి బొత్స సత్యనారాయణ, మంత్రి దాడిశెట్టి రాజా, పెనుగొండలో మంత్రి ఉషా శ్రీ చరణ్, పుంగనూర్‌లో మంత్రి పెద్దిరెడ్డిలు వెనుకంజలో ఉన్నారు.    

ఏపీ అసెంబ్లీ ఎన్నికలపై ప్రముఖ ఎన్నికల వ్యూహకర్త ప్రశాంత్‌ కిశోర్‌ ఇటీవల సంచలన వ్యాఖ్యలు చేశారు. ఓ ఇంటర్వ్యూలో మాట్లాడుతూ.. గత ఎన్నికల్లో భారీ ఆధిక్యంతో విజయాన్ని సొంతం చేసుకున్న జగన్‌కు ఈ సారి ఎన్నికల్లో ఘోర పరాభవం తప్పదని స్పష్టం చేశారు. ఈ నేపథ్యంలో ప్రశాంత్ కిశోర్ వ్యాఖ్యలపై సీఎం జగన్ స్పందించారు. 

విజయవాడ బెంజ్ సర్కిల్‌లో ఉన్న ఐప్యాక్ కార్యాలయానికి జగన్ వెళ్లారు. ఈ సందర్భంగా ఆయన ఎన్నికల ఫలితాలను అంచనా వేశారు. దాదాపు అరగంట సేపు ఐప్యాక్ ప్రతినిధులతో మాట్లాడారు. ఈ సందర్భంగా ఆయన మాట్లాడారు. ఏపీలో వైసీపీ మరోసారి ప్రభంజనం సృష్టించబోతోందని సీఎం జగన్ వ్యాఖ్యానించారు. వైసీపీ మళ్లీ అధికారంలోకి రాబోతోందని చెప్పారు. గత ఎన్నికల కంటే వైసీపీ అధిక సీట్లలో గెలవబోతోందని ధీమా వ్యక్తం చేశారు. 

మనం చరిత్ర సృష్టించబోతున్నామని ఆయన అన్నారు. గత ఎన్నికల్లో 151 అసెంబ్లీ సీట్లు, 22 ఎంపీ సీట్లను గెలిచామని, ఈసారి అంతకన్నా ఎక్కువ సీట్లు గెలుస్తామని జగన్ ధీమా వ్యక్తం చేశారు. ప్రశాంత్ కిశోర్ ఆలోచించలేనన్ని సీట్లు తమకు వస్తాయని తెలిపారు. జూన్ 4వ తేదీన వచ్చే ఫలితాల తర్వాత యావత్ దేశం మనవైపు చూస్తుందని అన్నారు. రానున్న రోజుల్లో వైసీపీ, ఐప్యాక్ ప్రయాణం ఇలాగే ముందుకు సాగుతుందని అన్నారు.