విశ్వంభర,హైదరాబాద్ : హైదరాబాద్ నగరవాసులకు జీహెచ్‌ఎంసీ సేవలు ఇకపై మరింత సులభంగా అందుబాటులోకి రానున్నాయి. పౌరులు తమ స్మార్ట్‌ఫోన్‌లోని వాట్సప్ ద్వారానే ఫిర్యాదులు చేయడం, పన్నులు చెల్లించడం వంటి పనులను చక్కబెట్టుకునేలా సరికొత్త వ్యవస్థను జీహెచ్‌ఎంసీ సిద్ధం చేస్తోంది. ఇందుకోసం కృత్రిమ మేధ (ఏఐ) ఆధారిత వాట్సప్ చాట్‌బాట్‌ను త్వరలోనే ప్రారంభించనుంది. ఈ చాట్‌బాట్ ద్వారా పౌరులు తమ సమస్యలను సులభంగా ఫిర్యాదు చేయవచ్చు. వాట్సప్‌లో ఫిర్యాదు నమోదు చేయగానే, ఆ సమాచారం నేరుగా సంబంధిత అధికారికి వెళ్తుంది. ఏ సమస్యకు ఏ అధికారిని సంప్రదించాలో కూడా ఈ చాట్‌బాట్ తెలియజేస్తుంది. దీనితో పాటు ఆస్తి పన్ను, ట్రేడ్ లైసెన్స్ వంటి చెల్లింపులను కూడా ఇకపై వాట్సప్ నుంచే పూర్తి చేసే సౌకర్యాన్ని కల్పించనున్నారు. ప్రస్తుతం ఈ సేవలు జీహెచ్‌ఎంసీ వెబ్‌సైట్, మొబైల్ యాప్‌లో మాత్రమే ఉన్నాయి.

అంతేకాకుండా, జనన, మరణ ధ్రువీకరణ పత్రాలు, ట్రేడ్ లైసెన్సులు వంటివి ఎలా పొందాలో, ఎవరిని సంప్రదించాలో వంటి వివరాలను కూడా ఈ చాట్‌బాట్ అందిస్తుంది. వార్డుల వారీగా అధికారుల ఫోన్ నంబర్లు సహా పూర్తి సమాచారం ఇందులో లభిస్తుంది. ప్రస్తుతం చాలా మందికి ఆన్‌లైన్ సేవలు, అధికారుల వివరాలపై సరైన అవగాహన లేకపోవడంతో చిన్న పనులకు కూడా ఇతరులపై ఆధారపడాల్సి వస్తోంది. ఈ సమస్యను అధిగమించేందుకే 24 గంటలూ అందుబాటులో ఉండే ఈ చాట్‌బాట్‌ను తీసుకొస్తున్నట్లు అధికారులు వివరించారు.ఈ చాట్‌బాట్ సేవలను ప్రారంభించేందుకు అవసరమైన టెండర్లను వచ్చే వారంలోనే పిలవనున్నట్లు జీహెచ్‌ఎంసీ ఐటీ విభాగం వర్గాలు తెలిపాయి. ఈ ప్రక్రియ పూర్తయిన వెంటనే సేవలు పూర్తిస్థాయిలో అందుబాటులోకి వస్తాయని, నగర పౌరులకు సేవలు మరింత వేగవంతం అవుతాయని భావిస్తున్నారు.

రంగారెడ్డి జిల్లా ఇంఛార్జ్ మంత్రి శ్రీధర్ బాబును ఈరోజు ఆరుగురు బిఆర్ఎస్ ఎమ్మెల్యేలు కలిశారు. మంత్రిని కలిసిన వారిలో ఎమ్మెల్యేలు సుధీర్ రెడ్డి, వివేకానంద గౌడ్, అరికెపూడి గాంధీ, మాధవరం కృష్ణారావు, లక్ష్మారెడ్డి, రాజశేఖర్ రెడ్డిలు ఉన్నారు.

తమ తమ నియోజకవర్గాలలో అభివృద్ధి పనులకు సహకరించాలని మంత్రిని ఎమ్మెల్యేలు కోరారు. అభివృద్ధి పనుల ప్రతిపాదనలను మంత్రికి అందించారు. అలాగే, జీహెచ్ఎంసీకి నిధులు విడుదల చేయాలని వారు శ్రీధర్ బాబును కోరారు. కొత్త ప్రభుత్వం ఏర్పడినప్పటి నుంచి జీహెచ్ఎంసీకి నిధులు విడుదల చేయలేదని వారు మంత్రి దృష్టికి తీసుకువెళ్లారు

తెలంగాణ వ్యాప్తంగా పలు ప్రాంతాలలో పెద్ద ఎత్తున వర్షాలు కురుస్తున్నాయి. కొన్నిచోట్ల భారీ వర్షాలు కురవడంతో రోడ్లన్నీ కూడా జలమయం అయ్యాయి. రాష్ట్రవ్యాప్తంగా పలు ప్రాంతాలలో భారీ వర్షాలు కురుస్తున్నటువంటి నేపథ్యంలో జిహెచ్ఎంసి అధికారులు తెలంగాణ ప్రజలకు పలు హెచ్చరికలు జారీ చేశారు. అవసరమైతే తప్ప ఎవరూ కూడా బయటకు రావద్దని వెల్లడించారు. 

రాష్ట్రవ్యాప్తంగా భారీ వర్షాలు కురుస్తున్న నేపథ్యంలో జిహెచ్ఎంసి అధికారులు టోల్ ఫ్రీ నెంబర్ కూడా ఏర్పాటు చేశారు. అత్యవసరం అయితే జిహెచ్ఎంసి అధికారుల సహాయం కోసం 040-21111111 లేదా 9000113667 కి ఫోన్ చేయాలని వెల్లడించారు. వర్షాలు తగ్గుముఖం పట్టే వరకు ప్రజలెవరు బయటకు రాకూడదని తెలిపారు. 

ఇలా పలు రాష్ట్రాలలో కుండపోతగా కురుస్తున్నటువంటి ఈ వానలు మరో ఐదు రోజులపాటు తెలంగాణ వ్యాప్తంగా కురిసే అవకాశాలు ఉన్నాయని వాతావరణ శాఖ హెచ్చరికలు జారీ చేసింది. ఇక మెరుపులు, ఉరుములతో కూడిన వర్షం కావడంతో వీలైనంతవరకు బహిరంగ ప్రదేశాలను తిరగకపోవడమే మంచిదనీ అధికారుల సూచిస్తున్నారు.