Uttarakhand News: ఉత్తరాఖండ్‌లో భారీ వర్షాల కారణంగా వరద పరిస్థితులు నెలకొన్నాయి. చమోలీ జిల్లాలో కురుస్తున్న ఎడతెరిపిలేని వర్షాలతో తమక్ వాగు ఉప్పొంగి ప్రవహిస్తోంది. వాగులో ఒక్కసారిగా వరద ఉధృతి పెరగడంతో దాని మీద ఉన్న ఇనుప వంతెన వరద ప్రవాహానికి కొట్టుకుపోయింది. భారీ నీటి ప్రవాహం ధాటికి వంతెన పూర్తిగా ధ్వంసం కావడంతో ఆ మార్గంలో రాకపోకలు పూర్తిగా నిలిచిపోయాయి.

వంతెన కొట్టుకుపోవడంతో స్థానికంగా ప్రజలు తీవ్ర ఇబ్బందులు ఎదుర్కొనే పరిస్థితి ఏర్పడింది. రహదారి మార్గం తెగిపోవడంతో అటువైపు రాకపోకలు నిలిచిపోయాయి. వరద ఉధృతి మరింత పెరిగే అవకాశం ఉందన్న నేపథ్యంలో అధికారులు అప్రమత్తమయ్యారు. అయితే వంతెన కొట్టుకుపోయిన ఘటనలో ఎలాంటి ప్రాణనష్టం జరగకపోవడంతో అధికారులు ఊపిరి పీల్చుకున్నారు.

పరిస్థితిని సమీక్షించేందుకు పోలీస్, SDRF, NDRF బృందాలు రంగంలోకి దిగాయి. వరద ప్రభావిత ప్రాంతాలను పరిశీలిస్తూ ప్రజల భద్రతకు అవసరమైన చర్యలు చేపడుతున్నారు. వాగులు, నదుల పరివాహక ప్రాంతాల్లో ఉన్న ప్రజలు అప్రమత్తంగా ఉండాలని, వరద ఉధృతి ఉన్న ప్రాంతాలకు వెళ్లవద్దని అధికారులు సూచిస్తున్నారు.

మరోవైపు భారీ వర్షాల కారణంగా కొండ ప్రాంతాల్లో మరిన్ని ప్రాంతాలు ప్రభావితమయ్యే అవకాశం ఉండటంతో అధికారులు పరిస్థితిని నిరంతరం పర్యవేక్షిస్తున్నారు. రాకపోకలు పునరుద్ధరించేందుకు ప్రత్యామ్నాయ మార్గాలను పరిశీలించడంతో పాటు వంతెన పునర్నిర్మాణం, మరమ్మతులపై అధికారులు తదుపరి చర్యలు చేపట్టనున్నారు. చమోలీ జిల్లాలో వాతావరణ పరిస్థితులపై యంత్రాంగం అప్రమత్తంగా ఉంది.

హిమాలయ పర్వతాల్లో విన్యాసాలు చేస్తుండగా విషాదం మిగిలింది. ట్రెక్కింగ్ చేస్తూ తొమ్మిది మంది ప్రాణాలు కోల్పోయారు. సహస్రతల్ ప్రాంతంలో వాతావరణం అనుకూలించకపోవడంతో ఈ విషాదం నెలకొన్నట్లు తెలుస్తోంది. మరికొంత మంది మంచులో చిక్కుకుపోయారు. అధికారులు తెలిపిన వివరాలు ఇలా ఉన్నాయి. 

కర్ణాటకకు చెందిన 18మంది ట్రెక్కర్లు ముగ్గురు స్థానిక గైడ్‌లు, మహారాష్ట్రకు చెందిన ఒకరు హిమాలయాల్లో టెక్కింగ్ చేస్తున్నారు. సుమారు 4,100-4400 మీటర్ల ఎత్తులో ఉన్న సహస్రతల్ ఆల్పైన్ సరస్సు వద్ద వారు ఈ విన్యాసం చేస్తున్నారు. అయితే ఉన్నట్టుండి వారు మంచులో చిక్కుకుపోయారు. వారిలో తొమ్మిది మంది మృతిచెందినట్లు అధికారులు వెల్లడించారు. మరో తొమ్మిది మంది ఆచూకీ లభ్యం కాలేదని తెలిపారు. 

అటవీశాఖకు చెందిన పది మంది సభ్యుల రెస్క్యూ టీమ్, ఎస్‌డీఆర్ఎఫ్ బృందం బుధవారం తెల్లవారుజామున ఉత్తరకాశీ నుంచి బయల్దేరాయన్నారు. ఉత్తరకాశీ జిల్లా ఆస్పత్రి, భట్వాడీ ప్రాథమిక ఆరోగ్య కేంద్రాలను అప్రమత్తం చేసినట్లు తెలిపారు. 14మంది రక్షణ సిబ్బంది, ఓ వైద్యుడిని ఘటనాస్థలానికి పంపామని చెప్పారు. క్షతగాత్రులను వెంటనే తరలించడానికి హెలికాప్టర్, అంబులెన్స్‌లను సిద్ధం చేశామన్నారు.