టీమిండియా ఆల్‌రౌండర్ హార్దిక్ పాండ్యాను వరుస వివాదాలు చుట్టుముడుతున్నాయి. ఇప్పటికే ఐపీఎల్ 2024లో కెప్టెన్‌గా విఫలమైన బాధలో ఉండగా ఇప్పుడు టీ 20 ప్రపంచ కప్‌లో ఎందుకు ఎంపిక చేశారనే విమర్శలను ఎదుర్కొంటున్నాడు. కెరీర్ పరంగా సవాళ్లు ఎదుర్కొంటున్న పాండ్యా వ్యక్తిగత జీవితంలోనూ ఆటుపోట్లను ఎదుర్కొంటున్నాడు.

ఈ నేపథ్యంలో జట్టుతో కలిసిన హార్దిక్ బంగ్లాతో జరిగిన వార్మప్ మ్యాచ్‌లో చెలరేగాడు. 40 పరుగులు చేయడంతో పాటు ఒక వికెట్ తీశాడు. మ్యాచ్ అనంతరం మాట్లాడిన హార్దిక్ తాను ఎదుర్కొంటున్న కొన్ని క్లిష్టపరిస్థితులను మీడియాతో పంచుకున్నాడు. ఏ సమస్యను సులువుగా వదిలిపెట్టనని చెప్పాడు. చివరి వరకూ పోరాడేందుకే ప్రయత్నిస్తానని తెలిపాడు. 

‘జీవితం అయినా మైదానం అయినా.. ఈ యుద్ధంలో చివరి వరకూ పోరాడుతూనే ఉండాలి. క్లిష్ట పరిస్థితుల్లో వాటిని వదిలేస్తే అనుకున్న ఫలితాలను సాధించలేం. నేను సాధించడంపైనే దృష్టి పెడతా. ఇలాంటి పరిస్థితి నాకు కొత్తేం కాదు. పోరాడుతూ ఉంటే పరిస్థితుల్లో మార్పు వస్తుంది. జీవితంలో బ్యాడ్ డేస్ మాత్రమే కాదు.. గుడ్ డేస్ కూడా ఉంటాయి. త్వరలోనే అన్నీ అనుకూలంగా మారుతాయని ఆశిస్తున్నా’ అని పాండ్యా అన్నాడు.