భారత్ ఈశాన్య రాష్ట్రమైన సిక్కింలో భారీ వర్షాలు కురుస్తున్నాయి. ఎడతెరిపిలేని వానతో పెద్దఎత్తున వరదలు వచ్చాయి. దీంతో పర్యాటకులు పలు ప్రాంతాల్లో చిక్కుకుపోయారు. బుధవారం రాత్రి నుంచి శుక్రవారం తెల్లవారుజాము వరకూ ఉత్తర సిక్కింలో 220 మి.మీకు పైగా వర్షం కురిసింది. దీంతో తీస్తాలో పెద్ద ఎత్తున వరదలు వచ్చాయి. ఈ వరదల ప్రభావిత ప్రాంతాల్లో 1,200 మందికి పైగా స్వదేశీ, విదేశీ పర్యాటకులు చిక్కుకున్నట్లు తెలుస్తోంది. 

అదేవిధంగా పలు ప్రాంతాల్లో కొండచరియలు విరిగిపడటంతో ఇళ్లలోకి భారీగా నీరు చేరింది. ఇక, వాతావరణం అనుకూలించిన తర్వాత పర్యాటకులను ఇక్కడి నుంచి తరలించేందుకు ఏర్పాట్లు చేస్తున్నట్లు అధికారులు వెల్లడించారు. రోడ్ల మరమ్మతు పనులకు వారం రోజుల సమయం పట్టవచ్చని చెబుతున్నారు. వరదల్లో ఇప్పటి వరకు ఆరుగురు గల్లంతు కాగా వారిలో ముగ్గురి మృతదేహాలు లభ్యమైనట్లు చెప్పారు. 

కాగా, సిక్కింలోని సంక్లాంగ్ ప్రాంతంలో వంతెన కొట్టుకుపోయి చుంగ్హాంగ్, లాచుంగ్ ప్రాంతాల్లో రాకపోకలు పూర్తిగా నిలిచిపోయాయి. సీఎం ప్రేమ్ సింగ్ తమాంగ్ అధికారులతో సమీక్షించారు. బాధిత ప్రాంతాలకు సంబంధించిన పరిస్థితులపై ఆరాతీశారు. సహాయక చర్యలు వేగవంతం చేయాలని ఆదేశించారు. వరదల్లో  చిక్కుకుపోయిన పర్యాటకులను ప్రత్యేక విమానంలో తరలించేందుకు కేంద్ర ప్రభుత్వంతో చర్చలు జరుపుతున్నట్లు సిక్కిం సీఎస్ విజయ్ భూషణ్ పాఠక్ తెలిపారు.

సిక్కిం సీఎం ప్రేమ్ సింగ్ తమాంగ్ సతీమణి కృష్ణ కుమారి రాయ్ ఎమ్మెల్యేగా ప్రమాణస్వీకారం చేసిన మరుసటి రోజు తన పదవికి రాజీనామా చేశారు. దానిని స్పీకర్ ఎంఎన్ షెర్పా ఆమోదించినట్లు అసెంబ్లీ కార్యదర్శి లలిత్ కుమార్ గురుంగ్ గురువారం ధ్రువీకరించారు. 

ఇదిలా ఉంటే ఈ ఎన్నికల్లో 07-సో రెంగ్-చకుంగ్, 19-రెనోక్ నియోజకవర్గాల్లో ముఖ్యమంత్రి ప్రేమ్ సింగ్ తమాంగ్ విజయం సాధించారు. దీంతో సోరెంగ్-చకుంగ్ స్థానానికి రాజీనామా చేశారు. ఎన్నికల నియమావళి 1961 సెక్షన్ 67/A ప్రకారం రెండు స్థానాల్లో పోటీ చేసి గెలిచిన అభ్యర్థులు ఫలితాలు ప్రకటించిన 14 రోజులలోపు ఒక నియోజకవర్గాన్ని వదులుకోవాల్సి ఉంటుంది.

ఈ నేపథ్యంలో ఇటీవల జరిగిన అసెంబ్లీ ఎన్నికల్లో కృష్ణ కుమారి రాయ్ నామ్చి-సింగితాంగ్ నియోజకవర్గంలో పోటీ చేసి విజయం సాధించారు. ఈ విషయంపై ఫేస్‌బుక్‌లో స్పందించిన ఆమె భర్త సీఎం ప్రేమ్ సింగ్ తమాంగ్ ‘‘నా జీవిత భాగస్వామి ఎమ్మెల్యే పదవికి రాజీనామా చేసింది.(సిక్కిం క్రాంతికారి మోర్చా) ఎస్కేఎం పార్టీ పార్లమెంటరీ కమిటీ అభ్యర్థన మేరకు ఆమె ఎన్నికల్లో పోటీ చేసింది. సభ్యుల ఏకగ్రీవ నిర్ణయంతో ఆమె తన పదవి నుంచి వైదొలగినట్లు రాష్ట్ర ప్రజలకు తెలియజేస్తున్నా. ఆమె తమకు ఇచ్చిన మద్దతుకు హృదయపూర్వక కృతజ్ఞతలు’’ అని పేర్కొన్నారు.

2024 లోక్సభ ఎన్నికల ఫలితాల్లో బీజేపీ తిరుగులేని విజయం దిశగా దూసుకెళ్తోంది. ఇప్పటికే ఎగ్జిట్ పోల్స్ అన్నీ బీజేపీ గెలుపు ఖాయమని తెలిపాయి. ఈ నేపథ్యంలో ఇవాళ(ఆదివారం) అరుణాచల్ ప్రదేశ్ అసెంబ్లీ ఎన్నికల ఫలితాల్లో బీజేపీ గెలుపు ఖాయమైంది. ఉదయం 6 గంటలకు ఓట్ల లెక్కింపు ప్రక్రియ మొదలవ్వగా మొదటి నుంచే బీజేపీ హవా కొనసాగింది. 

అటు సిక్కింలో అధికారంలో ఉన్న ఎస్కేఎం విజయ తీరాలకు చేరుకుంది. అరుణాచల్‌ అసెంబ్లీకి 60 స్థానాలు ఉండగా ఇప్పటికే మేజిక్ ఫిగర్ 31సీట్లను గెలుచుకుంది. మరో 14 స్థానాల్లో లీడింగ్‌లో ఉంది. దీంతో కమలం పార్టీ మరోసారి ప్రభుత్వ ఏర్పాటును ఖరారు చేసుకుంది. ఎన్‌పీపీ రెండు, పీపీఏ, ఇండిపెండెంట్‌లు చెరో స్థానంలో విజయం సాధించారు.  2019 అరుణాచల్ ప్రదేశ్ అసెంబ్లీ ఎన్నికల్లో బీజేపీకి 41 సీట్లు దక్కించుకుంది. జేడీయూకి ఏడు సీట్లు, ఎన్పీపీకి ఐదు సీట్లు వచ్చాయి. కాంగ్రెస్ నాలుగు చోట్ల గెలిచింది.

2024 సిక్కిం అసెంబ్లీ ఎన్నికల ఫలితాల్లో అధికార ఎస్కేఎం (సిక్కిం క్రాంతికారి మోర్చా) భారీ విజయాన్ని తన ఖాతాలో వేసుకుంది. 32 అసెంబ్లీ సీట్లకు ఆదివారం ఉదయం 6 గంటలకు ఓట్ల లెక్కింపు ప్రక్రియ మొదలవ్వగా మొదటి నుంచి ఎస్కేఎం దూకుడును ప్రదర్శించింది. మెజారిటీ 17గా ఉండగా.. పీవాల్యూ ప్రకారం.. ఎస్కేఎం ఇప్పటికే 13 చోట్ల గెలిచింది. సిక్కిం డెమొక్రటిక్ ఫ్రంట్ ఒక్క స్థానానికే పరిమితమైంది. బీజేపీ, కాంగ్రెస్ ఖాతానే తెరవలేదు. ఎస్‌కేఎం అధినేత ప్రేమ్ సింగ్ తమాంగ్ మరోసారి సీఎం పదవి చేపట్టడం ఖాయమైంది.